काठमाडौं । राष्ट्रिय प्रजातन्त्र पार्टी (राप्रपा) त्यागेका Dhawal Shamsher Rana ले देशमा बलियो राष्ट्रवादी शक्तिको आवश्यकता महसुस भएकाले नयाँ राजनीतिक दल निर्माणको अभियान थालिएको बताएका छन्।
प्रस्तावित राष्ट्रवादी पार्टीको जिम्मेवारी हस्तान्तरण तथा परिचयात्मक कार्यक्रममा बोल्दै उनले राप्रपाले राष्ट्रवादी शक्तिको भूमिकालाई प्रभावकारी रूपमा निर्वाह गर्न नसकेको दाबी गरे। पछिल्ला उपनिर्वाचन र हालै सम्पन्न प्रतिनिधिसभा निर्वाचनको परिणामले समेत त्यसलाई पुष्टि गरेको उनको भनाइ थियो।
राणाले सनातन धर्म, बौद्ध र किराँत परम्परालाई समेट्ने सनातनी हिन्दु अधिराज्यको एजेन्डालाई जनताले अस्वीकार नगरेको उल्लेख गर्दै समस्या एजेन्डामा नभई राप्रपाको कार्यशैलीमा रहेको बताए। उनले विगत ३५ वर्षमा जनताले पटक–पटक समर्थन गरे पनि नेतृत्व एजेन्डाप्रति इमानदार हुन नसकेको आरोप लगाए।
उनले नयाँ पार्टी सहमति र लोकतान्त्रिक प्रक्रियाबाट सञ्चालन हुने स्पष्ट पार्दै अनुशासनका नाममा दण्डात्मक शैली नअपनाइने बताए। सातै प्रदेशमा संगठन विस्तार गरी आगामी स्थानीय तह निर्वाचनमा स्वच्छ छवि भएका, जनप्रिय र योग्य व्यक्तिलाई उम्मेदवार बनाइने उनको भनाइ छ।
यसै कार्यक्रममा राष्ट्र, राष्ट्रियता, धर्म संस्कृति तथा नागरिक बचाउ महाभियानका संयोजक Durga Prasai ले देश निर्माणको जिम्मेवारी गम्भीर विषय भएको बताउँदै आफू इमानदार रूपमा देश र समाज परिवर्तनको अभियानमा लागेको बताए।
उनले आफूहरूमाथि विभिन्न आरोप लाग्ने गरेको उल्लेख गर्दै सत्य र इमानदारीको मार्गमा अघि बढ्ने प्रतिबद्धता व्यक्त गरे।
