दार्चुला — दार्चुलाको व्यास गाउँपालिका–१ छाङरु क्षेत्रमा भारतीय सुरक्षा निकायको हेलिकोप्टरले नेपालको हवाई क्षेत्र प्रयोग गरेको खुलेको छ। अनुमति नलिई भारतीय इन्डो–टिबेटन बोर्डर पुलिस (आईटीबीपी) का प्रमुख शत्रुजीत सिंह कपूर सवार हेलिकोप्टर उक्त क्षेत्रमा उडान गरेको हो।
जिल्ला प्रशासन कार्यालय दार्चुलाका अनुसार जेठ २७ गते बिहान उक्त हेलिकोप्टर छाङरु हुँदै कालापानी क्षेत्रतर्फ गएको थियो। उक्त उडानका लागि नेपाल सरकारबाट कुनै अनुमति लिइएको थिएन।
घटनाबारे सशस्त्र प्रहरीले जानकारी प्राप्त गरेपछि जिल्ला प्रशासन कार्यालयले गृह मन्त्रालयलाई सूचना पठाएको जनाएको छ। विस्तृत विवरण सोमबार मन्त्रालयमा पठाइने बताइएको छ।
यता, नेपाली सेना भने देशका विभिन्न दुर्गम भू–भागमा सडक निर्माण तथा पूर्वाधार विकासका काममा निरन्तर सक्रिय रहेको छ।
