काठमाडौं — कैलालीको गोदावरीमा भीरबाट टेम्पो खसालिएको घटनामा संलग्न १२ जना कर्मचारीलाई प्रहरीले नियन्त्रणमा लिएको छ।
डिभिजन वन कार्यालय कैलालीका कर्मचारीहरूले चुरे क्षेत्रको अतिक्रमण हटाउने क्रममा एक टेम्पोलाई भीरबाट धकेलेर खसालेको भिडियो सामाजिक सञ्जालमा सार्वजनिक भएपछि घटना विवादमा तानिएको हो।
घटना शनिबार गोदावरी–४ गाईमारे क्षेत्रको भएको हो। बासपानीकी ४४ वर्षीया धनादेवी धामीको टेम्पो वन कार्यालयका कर्मचारीहरूले भीरबाट खसालेको आरोप छ। धामी उक्त टेम्पोमा सामान राखेर सडक छेउमै व्यापार गर्दै आएकी थिइन्।
प्रहरीका अनुसार भिडियो सार्वजनिक भएपछि चौतर्फी आलोचना बढेपछि जिल्ला प्रहरी कार्यालय कैलालीले १२ जना कर्मचारीलाई नियन्त्रणमा लिएको हो। घटनाबारे थप सोधपुछका लागि डिभिजन वन कार्यालय र सब–डिभिजन वन कार्यालय अत्तरियाका ११ कर्मचारीलाई समेत बोलाइएको छ।
वन कार्यालयले भने टेम्पो वन तथा राजमार्ग अतिक्रमण क्षेत्रमा राखिएको र पटक–पटक हटाउन आग्रह गर्दा पनि अटेर भएपछि अतिक्रमण हटाउने क्रममा कारबाही गरिएको दाबी गरेको छ।
यता, टेम्पो धनी धामीले भने कानुनी प्रक्रिया बिना आफ्नो जीविकोपार्जनको साधन नष्ट गरिएको भन्दै न्यायको माग गरेकी छन्।
