काठमाडौं — सभामुख डोलप्रसाद अर्याल ले निर्माणाधीन नयाँ संसद भवनको काम समयमै सम्पन्न नभएको भन्दै तीव्र असन्तुष्टि व्यक्त गरेका छन्।
सोमबार निर्माणाधीन भवन तथा बैठक कक्षको स्थलगत अवलोकनका क्रममा उनले निर्माण व्यवसायीलाई निर्धारित समयमा काम सम्पन्न नगरे दैनिक एक करोड रुपैयाँ जरिवाना तिराउन सकिने चेतावनी दिएका हुन्।
नयाँ बानेश्वरस्थित संसद भवनका रूपमा प्रयोग हुँदै आएको अन्तर्राष्ट्रिय सम्मेलन केन्द्रमा आगजनी भएपछि प्रतिनिधिसभा र राष्ट्रिय सभाका बैठकहरू अस्थायी हलबाट सञ्चालन हुँदै आएका छन्।
अवलोकनका क्रममा सभामुख अर्यालले पटक–पटक समय थप्ने तर काममा प्रगति नदेखिएको भन्दै असन्तुष्टि जनाए। उनले निर्माण कार्यमा भइरहेको ढिलाइलाई राष्ट्रको प्रतिष्ठासँग जोडिएको विषय भएको उल्लेख गर्दै सम्बन्धित निकायलाई जवाफदेही बनाउनुपर्ने बताए।
“काम सम्पन्न गर्ने निश्चित मिति तय गरौँ, अन्यथा ढिलाइको मूल्य तिर्नुपर्ने अवस्था आउन सक्छ,” भन्दै उनले निर्माण व्यवसायीलाई समयमै जिम्मेवारी पूरा गर्न आग्रह गरे।
सभामुख अर्यालले हाल संसदको कामकाज अस्थायी व्यवस्थाबाट सञ्चालन भइरहेको उल्लेख गर्दै निर्माण कार्यमा भइरहेको ढिलाइलाई गम्भीर रूपमा लिनुपर्ने बताए। उनले आवश्यक परे वैकल्पिक स्थानबाट समेत संसद सञ्चालन गर्न सकिने संकेत दिएका छन्।
