काठमाडौँ । प्रतिनिधि सभामा विनियोजन विधेयक, २०८३ अन्तर्गत नौ वटा मन्त्रालयका बजेट शीर्षकमाथिको छलफल सम्पन्न भएको छ।
सोमबार बसेको बैठकमा युवा, श्रम तथा रोजगार मन्त्रालय, उद्योग, वाणिज्य तथा आपूर्ति मन्त्रालय, कृषि, वन तथा वातावरण मन्त्रालय, सूचना तथा सञ्चार मन्त्रालय, संस्कृति, पर्यटन तथा नागरिक उड्डयन मन्त्रालय, शिक्षा तथा खेलकुद मन्त्रालय, स्वास्थ्य तथा खाद्य स्वच्छता मन्त्रालय, भूमि व्यवस्था, सहकारी तथा सङ्घीय मामिला एवं सामान्य प्रशासन मन्त्रालय तथा महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयको बजेटमाथि विस्तृत छलफल भएको हो।
उक्त मन्त्रालयहरूको विनियोजन शीर्षकमाथि १२ जना सांसदहरूले खर्च कटौतीका प्रस्तावसहित आफ्नो धारणा राखेका थिए। साथै, अन्य सांसदहरूले पनि बजेटका प्राथमिकता, प्रभावकारिता र कार्यान्वयनका विषयमा आ-आफ्ना धारणा प्रस्तुत गरेका थिए।
छलफल सम्पन्न भएपछि सभामुख डोलप्रसाद अर्यालले मंगलबारको बैठकको कार्यसूचीबारे जानकारी गराएका छन्। उनका अनुसार विज्ञान, प्रविधि तथा नवप्रवर्तन मन्त्रालय, कानुन, न्याय तथा संसदीय मामिला मन्त्रालय, पूर्वाधार विकास मन्त्रालय, गृह मन्त्रालय, ऊर्जा, जलस्रोत तथा सिँचाइ मन्त्रालय, परराष्ट्र मन्त्रालय, अर्थ मन्त्रालय तथा रक्षा मन्त्रालयको बजेटमाथि समूहीकृत छलफल हुनेछ।
त्यसैगरी, प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालय, उपराष्ट्रपतिको कार्यालय र राष्ट्रपतिको कार्यालयको विनियोजन शीर्षकमाथि पनि मंगलबार नै समूहीकृत छलफल हुने कार्यसूची तय गरिएको छ।
प्रतिनिधि सभाको अर्को बैठक असार २ गते मंगलबार बिहान ११ बजे बस्ने गरी स्थगित गरिएको छ।
