काठमाडौँ । राष्ट्रिय स्वतन्त्र पार्टी (रास्वपा) की समानुपातिक सांसद सृष्टि भट्टराईले सामाजिक सञ्जालमा भाइरल भइरहेको आफ्नो भिडियोबारे स्पष्टीकरण दिएकी छन्।
गुडिरहेको कारको झ्यालबाट बाहिर निस्किएर रमाइलो गरिरहेको उक्त भिडियो सार्वजनिक भएपछि उनले शनिबार सामाजिक सञ्जालमार्फत आफ्नो धारणा सार्वजनिक गरेकी हुन्।
सांसद भट्टराईका अनुसार उक्त भिडियो हालको नभई आफू सार्वजनिक जिम्मेवारी र सरकारी नियुक्तिमा आउनुभन्दा धेरै अघिको निजी क्षणसँग सम्बन्धित हो।
‘यो भिडियो मेरो हालको सार्वजनिक जिम्मेवारी वा सरकारी नियुक्तिभन्दा अगाडिको निजी समयसँग सम्बन्धित रहेको कुरा स्पष्ट गर्न चाहन्छु,’ उनले भनेकी छन्। त्यतिबेला आफू सवारी चालक नभई यात्रुको रूपमा रहेको र उक्त क्षण केवल रमाइलोका रूपमा कैद गरिएको उनको भनाइ छ।
सार्वजनिक पदमा रहे पनि निजी जीवन जिउने अधिकार रहने उल्लेख गर्दै उनले व्यक्तिगत क्षणका आधारमा अनावश्यक आलोचना गर्नु उपयुक्त नहुने बताएकी छन्। उनले भनिन्, ‘सार्वजनिक पदमा रहे पनि व्यक्तिले आफ्नो निजी जीवनका सामान्य क्षणहरू जिउने अधिकार गुमाउँदैन।’
भिडियोमा देखिएको गतिविधि ट्राफिक नियम र सडक सुरक्षाका दृष्टिले उपयुक्त नहुन सक्ने स्वीकार गर्दै उनले भविष्यमा यस्ता गतिविधि दोहोर्याउने छैन भन्ने प्रतिबद्धता व्यक्त गरेकी छन्।
छोटो र पुरानो भिडियोका आधारमा व्यक्तिको चरित्र र जिम्मेवारीबोधको मूल्याङ्कन नगर्न उनले आग्रह गरेकी छन्। व्यक्तिको समग्र कार्यसम्पादन, व्यवहार र योगदानका आधारमा मूल्याङ्कन गर्नुपर्ने उनको भनाइ छ।
आफू आफ्नो जिम्मेवारीप्रति पूर्ण प्रतिबद्ध रहेको र जनताको विश्वासलाई सम्मान गर्दै इमान्दारिताका साथ काम गरिरहने पनि उनले स्पष्ट पारेकी छन्।
