काठमाडौं । आइतबारदेखि चितवनमा सुरु हुने राष्ट्रिय स्वतन्त्र पार्टी (रास्वपा) को प्रथम महाधिवेशनमा प्रमुख राजनीतिक दलका शीर्ष नेताहरू सहभागी नहुने भएका छन्। महाधिवेशनमा शुभकामना दिन नेपाली कांग्रेस, एमाले र नेकपाबाट अध्यक्ष वा शीर्ष तहका नेताको सट्टा अन्य प्रतिनिधि पठाउने तयारी भएपछि यसको राजनीतिक अर्थबारे चर्चा हुन थालेको छ।
नेपाली कांग्रेसले हालसम्म प्रतिनिधिको टुंगो लगाएको छैन। एमालेले पूर्वउपमहासचिव प्रदीप ज्ञवालीलाई पठाउने निर्णय गरेको छ भने नेकपाबाट उपमहासचिव वर्षमान पुन सहभागी हुने भएका छन्। राप्रपाका अध्यक्ष राजेन्द्र लिङ्देन भने स्वयं महाधिवेशनमा उपस्थित हुने कार्यक्रम छ।
संसदमा प्रभावशाली उपस्थिति बनाएको रास्वपाको महाधिवेशनमा प्रमुख दलका शीर्ष नेताहरू अनुपस्थित रहने निर्णयलाई कतिपयले राजनीतिक दूरी वा प्रतिस्पर्धी दलप्रतिको दृष्टिकोणका रूपमा व्याख्या गरेका छन्। विशेषगरी एमाले र नेकपाले उच्च तहका नेताभन्दा तल्लो वरीयताका प्रतिनिधि पठाउने निर्णयप्रति विभिन्न कोणबाट टिप्पणी भइरहेको छ।
राजनीतिक विश्लेषक आनन्दराम पौडेलले यसलाई पुराना दलहरूको अहंकार र असहजताको संकेतका रूपमा व्याख्या गरेका छन्। उनका अनुसार नयाँ राजनीतिक शक्तिको रूपमा उदाएको रास्वपाप्रति पुराना दलहरू अझै सहज बन्न नसकेको देखिन्छ।
यद्यपि सम्बन्धित दलहरूले भने प्रतिनिधि छनोटलाई सामान्य राजनीतिक प्रक्रिया र व्यस्तता वा स्वास्थ्य अवस्थासँग जोडेर व्याख्या गरेका छन्। महाधिवेशनमा विभिन्न दलका प्रतिनिधिहरूको सहभागिता रहने भए पनि शीर्ष नेताको अनुपस्थितिले राजनीतिक वृत्तमा चासो र बहस सिर्जना गरेको छ।
