ग्यास विक्रेता संघ नेपाल, काठमाडौं अन्तर्गत कागेश्वरी मनोहरा नगर समितिको प्रथम वार्षिक साधारण सभा काठमाडौंस्थित हाइली क्रियटिभ स्कुलमा भव्य तथा सभ्य रूपमा सम्पन्न भएको छ।
कार्यक्रमको अध्यक्षता कागेश्वरी मनोहरा नगर समितिका अध्यक्ष प्रकाश लामिछानेले गरेका थिए भने कार्यक्रम सञ्चालक बसन्तराज पोखरेलले गरेका थिए। प्रमुख अतिथिका रूपमा कागेश्वरी मनोहरा नगरपालिका–७ का कार्यवाहक अध्यक्ष भक्त थापा उपस्थित थिए। त्यसैगरी, विशिष्ट अतिथिका रूपमा ग्यास विक्रेता महासंघ नेपालका अध्यक्ष ज्ञानेश्वर अर्यालको उपस्थिति रहेको थियो।
कार्यक्रममा अतिथिका रूपमा बृदिगम्भीर पण्डित, महेश्वर चापागाईं, हरिकृष्ण ढकाल, रामप्रसाद ज्ञवाली, गेहेन्द्र रिजाल, कुञ्ज गेटे, रविन कार्की, डिलराज भट्टराई, हेमबहादुर थापा, मञ्जु थापालगायत विभिन्न ग्यास डिलर तथा व्यवसायिक संस्थाका प्रतिनिधिहरूको उल्लेखनीय सहभागिता रहेको थियो।
सभाको अवसरमा सदस्यहरूलाई परिचयपत्र (आईडी कार्ड) तथा सम्मानपत्र/प्रमाणपत्र वितरण गरिएको थियो। कार्यक्रममा संस्थागत गतिविधि, व्यवसायिक चुनौती, उपभोक्ता सेवा र आगामी योजनाका विषयमा समेत विस्तृत छलफल गरिएको थियो।
आयोजक ग्यास विक्रेता महासंघ नेपाल तथा नेपाल ग्यास उद्योग प्रा.लि., बालाजु, काठमाडौं को प्रायोजनमा आयोजित कार्यक्रममा विशेष आकर्षणका रूपमा उपभोक्ता जनचेतनामूलक प्रशिक्षण कार्यक्रम सञ्चालन गरिएको थियो। उक्त कार्यक्रममा ग्यासको सुरक्षित प्रयोग, ग्यास सिलिन्डर तथा पाइपबाट हुन सक्ने चुहावटको पहिचान, चुहावट भएमा अपनाउनुपर्ने सावधानी, आगलागी नियन्त्रणका उपाय तथा सम्भावित दुर्घटनाबाट बच्ने विधिबारे प्रयोगात्मक रूपमा प्रशिक्षण प्रदान गरिएको थियो।
प्रशिक्षकहरूले ग्यास चुहावट भएको अवस्थामा तत्काल के गर्ने, आगो लागेमा कसरी नियन्त्रण गर्ने, घर तथा व्यवसायिक प्रतिष्ठानमा ग्यास प्रयोग गर्दा ध्यान दिनुपर्ने सुरक्षा मापदण्डलगायत विषयमा प्रत्यक्ष प्रदर्शनसहित जानकारी दिएका थिए। सहभागीहरूले समेत प्रशिक्षणबाट महत्वपूर्ण ज्ञान हासिल गरेको बताएका थिए।
कार्यक्रमको समापन गर्दै वक्ताहरूले सुरक्षित ग्यास प्रयोग, व्यवसायिक अनुशासन तथा उपभोक्ता हितलाई प्राथमिकतामा राखेर अघि बढ्नुपर्नेमा जोड दिएका थिए। सहभागीहरूले यस्ता जनचेतनामूलक तथा सीपमूलक कार्यक्रमले व्यवसायी र उपभोक्ता दुवैलाई लाभ पुग्ने विश्वास व्यक्त गरेका थिए।
