ग्यास विक्रेता महासंघ नेपालले ग्यास विक्रेताहरूलाई आधुनिक प्रणालीमा आधारित हिसाब–किताब तथा कारोबार व्यवस्थापनमा सहजता प्रदान गर्ने उद्देश्यले ई–बिलिङ तथा अकाउन्टिङ सफ्टवेयर सम्बन्धी विशेष तालिम तथा परिचयात्मक कार्यक्रम सम्पन्न गरेको छ।
उक्त कार्यक्रममार्फत विक्रेताहरूलाई कारोबारमा हुने मिसम्याच (गलत हिसाब–किताब) बाट जोगाउनका लागि कम खर्चमा, सरल र सहज रूपमा प्रयोग गर्न सकिने सफ्टवेयर प्रणाली महासंघले उपलब्ध गराएको जानकारी दिइएको छ। यस प्रणालीमार्फत विक्रेताहरूले आफ्नो दैनिक खरिद–बिक्री, हिसाब–किताब तथा कर सम्बन्धी विवरणहरू डिजिटल रूपमा व्यवस्थापन गर्न सक्ने व्यवस्था मिलाइएको छ।
कार्यक्रममा ग्यास विक्रेता महासंघ नेपालका अध्यक्ष ज्ञानेश्वर अर्याल, वरिष्ठ उपाध्यक्ष विष्णु प्रसाद हुलाल, उपाध्यक्षहरू गेहेन्द्र रिजाल, रामप्रसाद ज्ञवाली तथा राधिका महर्जन, सचिव कृष्ण गैरे, कोषाध्यक्ष रविन कार्की लगायत केन्द्रीय सदस्यहरूको उल्लेखनीय उपस्थिति रहेको थियो। साथै विभिन्न जिल्ला संघका अध्यक्ष हेमबहादुर थापा, प्राविधिक पक्षबाट संजीव न्यौपाने र अभिषेक सर तथा अन्य ग्यास विक्रेताहरूको पनि सक्रिय सहभागिता रहेको थियो।
तालिमको क्रममा सफ्टवेयरको प्रयोग विधि, दैनिक कारोबार कसरी इन्ट्री गर्ने, सामान खरिद तथा बिक्री प्रक्रिया, भ्याट (VAT) व्यवस्थापन, र रिपोर्टिङ प्रणाली लगायतका विषयमा विस्तृत रूपमा प्रशिक्षण तथा छलफल गरिएको थियो।
कार्यक्रमले ग्यास व्यवसायलाई डिजिटल प्रणालीतर्फ उन्मुख गराउँदै पारदर्शिता, दक्षता र व्यवस्थापनमा महत्वपूर्ण योगदान पुग्ने अपेक्षा गरिएको छ।
