काठमाडौं। राष्ट्रपति रामचन्द्र पौडेलले जमिन बाँझो राख्ने प्रवृत्तिको अन्त्य गर्दै कृषिमा आधुनिकीकरण गर्नुपर्ने आवश्यकता औँल्याएका छन्।
२३औँ राष्ट्रिय धान दिवस, २०८३ का अवसरमा शुभकामना सन्देश जारी गर्दै उनले कृषिलाई आधुनिक र व्यावसायिक बनाउँदै विदेश पलायन हुन बाध्य जनशक्तिलाई स्वदेशमै रोजगारीका अवसर सिर्जना गर्नुपर्ने बताए। यसबाट धान तथा चामलको आयात घटाई देशलाई आत्मनिर्भर बनाउन सकिने उनको भनाइ छ।
राष्ट्रपतिले श्रम संस्कृतिको विकाससँगै धान उत्पादनमा आत्मनिर्भर बन्न सम्पूर्ण ध्यान केन्द्रित गर्नुपर्नेमा जोड दिँदै कृषि केवल जीविकोपार्जनको माध्यम नभई सम्मानित र आकर्षक व्यवसायका रूपमा विकास गर्न सबैलाई आह्वान गरेका छन्। साथै, त्यसका लागि सम्बन्धित निकायले आवश्यक नीति, योजना र सहयोग उपलब्ध गराउनुपर्ने उल्लेख गरेका छन्।
धान रोपाइँको महिना नेपाली कृषि संस्कृति र जीवनशैलीसँग गहिरो रूपमा जोडिएको उल्लेख गर्दै उनले हिलोमा रमाउँदै धान रोप्ने परम्परा तथा दही–चिउरा, अचारजस्ता परिकारले असार १५ लाई विशेष बनाएको बताए।
राष्ट्रपति पौडेलले जलवायु परिवर्तनका कारण धान उत्पादनमा बढ्दो नकारात्मक असर देखिएको उल्लेख गर्दै जलवायुमैत्री प्रविधिको प्रयोगमार्फत उत्पादन र उत्पादकत्व वृद्धि गर्न सरकार, किसान तथा सरोकारवाला सबै पक्ष सचेत हुनुपर्ने आवश्यकता औँल्याएका छन्।
उनले नेपालमा बढ्दो कृषि परनिर्भरताको अन्त्य गर्न धान उत्पादन, आधुनिकीकरण र व्यवसायीकरणलाई प्राथमिकता दिनुपर्ने बताए। यस वर्ष ‘जलवायुमैत्री प्रविधि, धानमा आत्मनिर्भरता र समृद्धि’ भन्ने नारासहित राष्ट्रिय धान दिवस मनाइँदै छ।
संविधानले खाद्यसम्बन्धी हकलाई मौलिक अधिकारका रूपमा सुनिश्चित गरेको स्मरण गराउँदै राष्ट्रपति पौडेलले कृषकलाई आवश्यक कृषि सामग्री, उत्पादनको उचित मूल्य तथा बजार पहुँच सुनिश्चित गर्न राज्य गम्भीर हुनुपर्ने बताए।
शुभकामना सन्देशमा उनले नेपालमा धानखेती अझै पनि वर्षामा निर्भर रहेको उल्लेख गर्दै धानखेतीयोग्य जमिनमा पर्याप्त सिँचाइ सुविधा विस्तार गर्न राज्यले विशेष प्राथमिकता दिनुपर्नेमा जोड दिएका छन्।
