चितवन । चितवन राष्ट्रिय निकुञ्जभित्र सञ्चालन हुँदै आएको जङ्गल सफारी सेवा आजदेखि अस्थायी रूपमा बन्द गरिएको छ। वर्षायाममा भलबाढी, कच्ची वनमार्ग बिग्रिने, रुख ढलेर बाटो अवरुद्ध हुने तथा पर्यटकको सुरक्षालाई ध्यानमा राख्दै सफारी सेवा स्थगित गरिएको निकुञ्जले जनाएको छ।
निकुञ्जका सूचना अधिकारी अविनास थापामगरका अनुसार अर्को सूचना जारी नभएसम्म जङ्गल सफारी सञ्चालन नहुनेछ। उनका अनुसार वर्षायाम वन्यजन्तु तथा चराचुरुङ्गीको प्रजननका लागि उपयुक्त समय भएकाले उनीहरूको प्राकृतिक बासस्थानमा अनावश्यक असर नपरोस् भन्ने उद्देश्यले पनि सफारी बन्द गरिएको हो।
निकुञ्जले प्रत्येक वर्ष वर्षायाममा जङ्गल सफारी सेवा बन्द गर्दै आएको छ। मौसममा सुधार आएपछि, सामान्यतया दसैँ आसपासबाट पुनः सफारी सञ्चालन गर्ने परम्परा रहेको छ।
यद्यपि, निकुञ्जभित्रको सफारी बन्द भए पनि सामुदायिक वन क्षेत्रमा सञ्चालन हुने जिप सफारी भने यथावत् रहने जनाइएको छ।
चितवनको सौराहा, कसरा, मेघौली, माडी तथा नवलपरासीका विभिन्न क्षेत्रबाट पर्यटकहरू जिपमार्फत निकुञ्ज प्रवेश गरी वन्यजन्तु अवलोकन र प्राकृतिक सौन्दर्यको आनन्द लिने गर्दछन्।
