कोशी प्रदेश, मोरङको लेटाङमा बस्दै आउनुभएका जगद्गुरु शिव शक्ति बाबा बाढी तथा प्राकृतिक विपद्बाट प्रभावित परिवारलाई राहत वितरण गर्न भोलि नुवाकोट जाने हुनुभएको छ।
बाढीपीडितको तत्कालीन आवश्यकतालाई मध्यनजर गर्दै शिव शक्ति बाबाको पहलमा १ लाख २० हजार रुपैयाँभन्दा बढी मूल्य बराबरका विभिन्न खाद्यान्न तथा राहत सामग्री संकलन गरिएको छ। उक्त राहत सामग्रीमा ५० बोरा चामल, भुजा, चिउरा, पानी, चाउचाउ, दाल, बुट लगायतका खाद्यान्न सामग्री समावेश छन्।
विपद्को कठिन समयमा प्रभावित परिवारलाई केही राहत पुगोस् भन्ने उद्देश्यले सामग्री लिएर नुवाकोट जान लागिएको जनाइएको छ। बाढीका कारण घरबार तथा दैनिक जीवन प्रभावित भएका स्थानीयलाई आवश्यकताअनुसार राहत सामग्री वितरण गरिनेछ।
मानवीय सेवाको भावनासहित प्रभावित समुदायको साथमा उभिँदै राहत वितरण गर्न लागिएको हो। विपद्को समयमा एकअर्कालाई सहयोग गर्दै पीडित परिवारको दुःखमा साथ दिनुपर्ने सन्देशसहित शिव शक्ति बाबाले यो अभियान अघि बढाउनुभएको हो।
राहत सामग्री बोकेर भोलि नुवाकोट पुग्ने र प्रभावित क्षेत्रमा प्रत्यक्ष रूपमा राहत वितरण गर्ने तयारी गरिएको छ। 🙏
