काठमाडौं । भोटेकोशीमा बाढी आएको भोलिपल्टदेखि नै गायक दुर्गेश थापा नुवाकोटका बाढी प्रभावितको उद्धार तथा राहतमा सक्रिय रहँदै आएका छन्। सुरुवातमा उनले विदुरका बाढीपीडितलाई लत्ताकपडा वितरण गर्नुका साथै आफैं खाना पकाएर खुवाएका थिए।
बाढीका कारण आसपासका पुलहरू बगाएपछि थापा गल्छीको बाटो हुँदै करिब ११ घण्टा घुमेर त्रिशूली नदीपारि रहेको कोलोनी क्षेत्रका पीडितसम्म पुगेका थिए। त्यहाँ पनि उनले आवश्यक राहत सामग्री वितरण गर्दै पीडितलाई सहयोग गरेका थिए।
नुवाकोटमा नौ दिनसम्म राहत तथा उद्धारमा खटिएका थापा आज रसुवातर्फ लागेका छन्। रसुवाको कालिका गाउँपालिका–१, २ र ३ का बाढीपीडितका लागि अत्यावश्यक लत्ताकपडा, दाल, चामल तथा भाँडाकुँडालगायत सामग्री बोकेर उनी त्यसतर्फ गएका हुन्।
थापाका अनुसार धेरै व्यक्तिले फोन तथा सन्देशमार्फत कालिका गाउँपालिकाका ती वडामा अझै राहत पर्याप्त रूपमा पुग्न नसकेको जानकारी गराएका थिए। त्यसपछि उनले सम्बन्धित वडाध्यक्षसँग सम्पर्क गर्दा त्यहाँको अवस्था गम्भीर रहेको र डेढ सयभन्दा बढी पीडितले अझै राहत पाउन नसकेको जानकारी पाएपछि रसुवा जाने निर्णय गरेका हुन्।
नुवाकोटमा नौ दिनसम्मको उद्धार तथा राहत अभियानमा लागेको सम्पूर्ण खर्च आफूले नै बेहोरेको थापाले बताए। लत्ताकपडादेखि खाद्यान्नसम्म आफ्नै खर्चमा व्यवस्थापन गरेको उनले बताए। रसुवातर्फ जाने क्रममा भने आफन्त तथा साथीभाइबाट सहयोग प्राप्त भएको उनको भनाइ छ। जापानस्थित घुम्ते युवा परिवारसहित विभिन्न साथीभाइले आर्थिक सहयोग गरेको थापाले जानकारी दिए।
बाढी प्रभावित क्षेत्रको अवस्था अत्यन्तै दर्दनाक रहेको थापाले बताए। नदी किनारमा दुर्गन्ध फैलिएको तथा गाईवस्तुदेखि मानिसका शवसमेत भेटिएको उनले उल्लेख गरे।
थापाले सरकारलाई अझै पनि उद्धारको आवश्यकता रहेका स्थानमा तत्काल ध्यान दिन आग्रह गरेका छन्। उनले भने, “अझै पनि कतिपय मानिस फसेका छन्। हेलिकोप्टरबाट नदी आसपासका क्षेत्रमा निगरानी बढाएर फसेकाहरूको तत्काल उद्धार गर्नुपर्छ। सुत्नलाई जसोतसो व्यवस्था भए पनि खानाको अवस्था निकै कठिन छ। सरकारले छिटोभन्दा छिटो आवश्यक खाद्यान्न तथा राहतको व्यवस्था गर्नुपर्छ।”
