काठमाडौं । सरकारले साउन १ गतेदेखि कार्यान्वयनमा ल्याएको विद्युतीय ड्राइभिङ लाइसेन्स तथा सवारी दर्ता प्रणाली (ईडीएलभिआरएस) मार्फत सवारी चालक अनुमतिपत्र (लाइसेन्स) छपाइ सुरु गरेको छ।
सेवाग्राहीको बढ्दो चाप र लामो समयदेखि थुप्रिएको लाइसेन्स छपाइ तथा वितरणको समस्या समाधान गर्ने उद्देश्यले यातायात व्यवस्था विभागले नयाँ प्रविधिमा आधारित प्रणाली सञ्चालनमा ल्याएको हो।
नयाँ प्रणाली लागू भएसँगै नयाँ लाइसेन्स लिनेदेखि पुरानो लाइसेन्स नवीकरणसम्मको प्रक्रिया थप छरितो, सहज र प्रविधिमैत्री हुने अपेक्षा गरिएको छ।
ईडीएलभिआरएसमा प्रविष्ट भएका सेवाग्राहीका विवरण सिधै सुरक्षण मुद्रण केन्द्रमा पुग्नेछन्। त्यहाँ लाइसेन्स छपाइ सम्पन्न भएपछि हुलाकमार्फत सम्बन्धित यातायात व्यवस्था सेवा कार्यालयमा पठाइने व्यवस्था गरिएको छ।
यसबाट विगतमा लाइसेन्स छपाइ तथा वितरणमा देखिँदै आएको ढिलाइ कम हुने विभागको विश्वास छ।
नयाँ प्रणालीअन्तर्गत पहिलो चरणमा मधेश प्रदेशका ३ हजार ८१ वटा सवारी चालक अनुमतिपत्र छपाइ गरी वितरणका लागि हुलाकमार्फत सम्बन्धित कार्यालयमा पठाइसकिएको विभागले जनाएको छ।
नयाँ व्यवस्थाअनुसार प्रदेश सरकारले सुरक्षण मुद्रण केन्द्रसँग सम्झौता गरी आफैं पनि लाइसेन्स छपाइ गर्न सक्नेछन्। यही प्रावधानअनुसार मधेश प्रदेशले आफ्नै व्यवस्थापनमा लाइसेन्स छपाइ सुरु गरेको छ भने लुम्बिनी प्रदेश सरकारले पनि शुक्रबार सम्झौता गरी छपाइ प्रक्रिया अघि बढाउने भएको छ।
तर कुनै प्रदेशले सुरक्षण मुद्रण केन्द्रसँग सम्झौता नगरेमा सेवाग्राहीको सुविधालाई ध्यानमा राख्दै यातायात व्यवस्था विभाग र सुरक्षण मुद्रण केन्द्रको समन्वयमा केन्द्रबाटै लाइसेन्स छपाइ गर्ने व्यवस्था मिलाइएको विभागका अधिकारीहरूले बताएका छन्।
