रौतहट । रौतहटको फतुवा विजयपुर नगरपालिका–२, शीतलपुरमा नवरात्रिको पावन अवसरमा आज माता दुर्गा, ब्रह्म बाबा तथा सातोबहिनीको पूजा–आराधना भव्य रूपमा सम्पन्न भएको छ। पुस्तौँदेखि चल्दै आएको धार्मिक परम्परालाई निरन्तरता दिँदै सोमबार स्थानीयवासी तथा श्रद्धालु भक्तजनहरूको उपस्थितिमा विधिपूर्वक पूजा सम्पन्न गरिएको हो।
शीतलपुर गाउँमा लामो समयदेखि प्रचलनमा रहेको परम्परा अनुसार गाउँको वडा अध्यक्षको पहलमा प्रत्येक वर्ष माता दुर्गा, ब्रह्म बाबा तथा सातोबहिनीको पूजा आयोजना हुँदै आएको छ। सोही परम्परालाई निरन्तरता दिँदै यस वर्ष पनि वडा अध्यक्षमा निर्वाचित संजय यादव उर्फ अनिरुद्ध यादवको विशेष पहलमा पूजा सम्पन्न भएको हो।
शीतलपुर गाउँको धार्मिक परम्परालाई जीवन्त राख्न लामो समयदेखि श्री राम पुकार राय यादव (भागता जी) ले पूजा गराउँदै आउनुभएको छ। उहाँको निरन्तर योगदानले गाउँमा पुस्तौँदेखि चल्दै आएको धार्मिक विधि, आस्था र सांस्कृतिक परम्परालाई निरन्तरता दिन महत्त्वपूर्ण भूमिका खेलेको स्थानीय धार्मिक परम्परासँग जोडिएका व्यक्तिहरू बताउँछन्।
यस पूजालाई केवल धार्मिक अनुष्ठानका रूपमा मात्र नभई गाउँवासीबीच आपसी सद्भाव, एकता, भाइचारा र सामाजिक मेलमिलाप कायम गर्ने महत्त्वपूर्ण अवसरका रूपमा समेत लिने गरिएको छ। पूजाका अवसरमा स्थानीय बासिन्दाहरू एकै ठाउँमा भेला भई धार्मिक आस्थाको आदानप्रदान गर्नुका साथै गाउँको समग्र विकास, समृद्धि र प्रगतिका लागि प्रार्थना गर्ने गरेका छन्।
नवरात्रिको समयमा माता दुर्गाको आराधना गर्नाले शक्ति, साहस र सकारात्मक ऊर्जाको प्राप्ति हुने धार्मिक विश्वास रहिआएको छ। त्यसैगरी, ब्रह्म बाबा तथा सातोबहिनीप्रतिको आस्थाले पनि स्थानीय धार्मिक तथा सांस्कृतिक जीवनमा विशेष स्थान ओगटेको छ। यही आस्थालाई आत्मसात् गर्दै शीतलपुरवासीले वर्षौँदेखि यस पूजालाई निरन्तरता दिँदै आएका छन्।
आफ्नो गाउँमा प्रचलित धार्मिक परम्पराको संरक्षण गर्दै भावी पुस्तासम्म यसको महत्त्व र पहिचान पुर्याउनु सबैको साझा जिम्मेवारी भएको स्थानीयवासीको विश्वास छ। यस्ता धार्मिक तथा सांस्कृतिक कार्यक्रमले नयाँ पुस्तालाई आफ्नो मौलिक परम्परा, संस्कार र सामाजिक एकताबारे जानकारी गराउनसमेत सहयोग पुर्याउने अपेक्षा गरिएको छ।
नवरात्रिको यस पावन अवसरमा माता दुर्गा, ब्रह्म बाबा तथा सातोबहिनीको कृपा समस्त शीतलपुरवासीमा रहिरहोस्, गाउँमा सुख, शान्ति, समृद्धि र सु–स्वास्थ्य कायम होस् तथा फतुवा विजयपुर नगरपालिका–२, शीतलपुरले विकास र प्रगतिको नयाँ उचाइ हासिल गर्न सकोस् भन्ने कामना गरिएको छ।
