काठमाडौँ । स्वास्थ्य तथा जनसङ्ख्या मन्त्रालयले निपाह भाइरससम्बन्धी सम्भावित जनस्वास्थ्य जोखिमप्रति सतर्क रहन सर्वसाधारणलाई आग्रह गरेको छ। मन्त्रालयले नागरिकको स्वास्थ्य सुरक्षाका लागि सरकार पूर्ण रूपमा प्रतिबद्ध रहेको स्पष्ट पारेको छ।
केही देशमा निपाह भाइरसका घटना देखिएको सन्दर्भ उल्लेख गर्दै मन्त्रालयले आवश्यक सबै पूर्वतयारीका कदम चालिरहेको जनाएको छ। यसैक्रममा सबैलाई आतङ्कित नहुन, तर सचेत, सजग र जिम्मेवार बन्न अनुरोध गरिएको छ।
विश्व स्वास्थ्य सङ्गठन (डब्ल्यूएचओ) ले विश्वव्यापी तथा दक्षिण–पूर्वी एसिया क्षेत्रमा निपाह भाइरसको जनस्वास्थ्य जोखिम न्यून रहेको मूल्याङ्कन गरे पनि छिमेकी मुलुकमा देखिएका घटनालाई ध्यानमा राखी आवश्यक सतर्कता अपनाइएको मन्त्रालयको भनाइ छ।
मन्त्रालयअन्तर्गतको इपिडिमियोलोजी तथा रोग नियन्त्रण महाशाखाले देशभरका स्वास्थ्य संस्था र निकायलाई सचेत गराइसकेको र निपाह भाइरस परीक्षणका लागि आवश्यक तयारी गरिएको जनाएको छ।
निपाह भाइरस सङ्क्रमित चमेराको ¥याल, पिसाब वा मलमूत्रले दूषित फलफूल सेवन गर्दा, सङ्क्रमित व्यक्तिको रगत, थुक, पिसाब वा नजिकको सम्पर्कबाट तथा चमेरोबाट सुँगुर हुँदै मानिसमा सर्न सक्ने मन्त्रालयले जानकारी दिएको छ।
मन्त्रालयले फलफूल राम्ररी पखालेर मात्र खान, तरकारी राम्रोसँग पकाएर खान, सुरक्षित पानी उमालेर पिउन, जनावरका गोठ तथा फार्म सफा राख्न, मासु काट्दा पञ्जा र मास्क प्रयोग गर्न, नियमित रूपमा साबुन पानीले हात धुन र भिडभाडमा मास्क प्रयोग गर्न आग्रह गरेको छ।
ज्वरो, टाउको दुखाइ, मांसपेशी दुख्ने, चक्कर लाग्ने, खोकी, सास फेर्न गाह्रो हुने, वाकवाकी, बान्ता हुने तथा गम्भीर अवस्थामा होस गुम्नेजस्ता लक्षण देखिएमा बिरामीको शीघ्र पहिचान गरी आइसोलेसनमा राखेर रिपोर्टिङ गर्नुपर्ने मन्त्रालयले जनाएको छ।
शङ्कास्पद लक्षण देखिएमा नजिकको स्वास्थ्य संस्था वा १११५ मा तुरुन्त सम्पर्क गर्न आग्रह गर्दै मन्त्रालयले हालसम्म नेपालमा निपाह भाइरसका घटना पुष्टि नभएको र जोखिम न्यूनीकरणका लागि स्वास्थ्य निकाय पूर्ण तयारी अवस्थामा रहेको स्पष्ट पारेको छ।
मन्त्रालयले राष्ट्रिय तथा अन्तर्राष्ट्रिय साझेदार संस्थासँग समन्वय गर्दै अवस्था निरन्तर अनुगमन गरिरहेको जनाउँदै अफवाहमा नपर्न र आधिकारिक सूचनामात्र विश्वास गर्न सबैलाई अनुरोध गरेको छ।
