हेटौंडा । मकवानपुरको थाहा नगरपालिका–९, चित्लाङमा सोमबार राति एक वयस्क पोथी चितुवा मृत अवस्थामा फेला परेको छ। चित्लाङस्थित महालक्ष्मी खोलाको किनारमा चितुवा मृत अवस्थामा भेटिएको हो।
इलाका प्रहरी कार्यालय चित्लाङका प्रहरी सहायक निरीक्षक दिननाथप्रसाद यादवका अनुसार करिब ३९ केजी तौलको चितुवाको मुखबाट रगत बगिरहेको अवस्थामा फेला परेको थियो। प्रारम्भिक रूपमा चितुवाहरू आपसमा जुध्दा मृत्यु भएको हुन सक्ने अनुमान गरिएको छ।
प्रहरीका अनुसार चितुवा करिब ४ वर्ष उमेरको र १७० सेन्टिमिटर लम्बाइको रहेको छ। मार्गिन सामुदायिक वन उपभोक्ता समूहका अध्यक्ष सानुकाजी श्रेष्ठ, स्थानीय जनप्रतिनिधि तथा स्थानीयवासीहरूको रोहबरमा चितुवालाई चित्लाङस्थित गोदाम चौरमा लगेर व्यवस्थापन गरिएको जिल्ला प्रहरी कार्यालय मकवानपुरका प्रहरी नायब उपरीक्षक एवं प्रवक्ता पुस्कर बोगटीले जानकारी दिए।
घटनास्थल इलाका प्रहरी कार्यालय चित्लाङबाट करिब एक किलोमिटर दक्षिणमा पर्छ। चित्लाङ आसपासका सामुदायिक वन क्षेत्रमा चितुवासहित विभिन्न वन्यजन्तुहरूको वासस्थान रहेको बताइएको छ।
