नवलपरासी (बर्दघाट–सुस्तापूर्व) — प्रधानमन्त्री सुशीला कार्कीले मौसम प्रतिकूल भएमा हिमाली जिल्लामा दोस्रो चरणमा निर्वाचन गराउन सकिने स्पष्ट पारेकी छन्।
नवलपरासीको कावासोती नगरपालिका–१, हात्तिखोरमा आयोजित राष्ट्रिय सेवा दलको तालिम समापन कार्यक्रममा सहभागी भई सञ्चारकर्मीसँग कुराकानी गर्दै प्रधानमन्त्री कार्कीले निर्वाचन सफल बनाउन सरकारले आवश्यक सबै सहयोग गर्ने बताइन्।
उनले भनिन्, “विशेषगरी हिमाली जिल्लामा मौसम अनुकूल नभए निर्वाचन दोस्रो चरणमा गराउने तयारीमा सरकार रहन्छ।”
कम मतदाता रहेका दुर्गम स्थानमा सवारीसाधनको प्रयोग गरी मतदाता ओसारेर भए पनि निर्वाचन सम्पन्न गराइने प्रधानमन्त्रीको भनाइ थियो। तर, सबै प्रयास असफल हुने असाधारण अवस्थामा मात्र दोस्रो चरणमा निर्वाचनको विकल्प अपनाइने उनले स्पष्ट पारिन्।
प्रधानमन्त्री कार्कीले अहिलेसम्म कुनै पनि कारणले निर्वाचन सार्ने विषयमा औपचारिक छलफल नै नभएको उल्लेख गर्दै आगामी फागुन २१ गतेको निर्वाचनमा ढुक्क भएर जुट्न सबैलाई आग्रह गरिन्।
समयमै निर्वाचन सम्पन्न भई नवनिर्वाचित जनप्रतिनिधिले राज्य व्यवस्था सम्हाल्ने र देशलाई नयाँ दिशातर्फ अघि बढाउने विश्वास व्यक्त गर्दै उनले भनिन्, “निर्वाचन शान्तिपूर्ण, निष्पक्ष र भयरहित वातावरणमा सम्पन्न गर्न सरकार शतप्रतिशत प्रतिबद्ध छ।”
विशेष परिस्थितिमा हुन लागेको निर्वाचन भएकाले केही चुनौती देखिए पनि ती सबैको समाधान गर्दै निर्वाचन सम्पन्न गरिने प्रधानमन्त्री कार्कीको भनाइ छ।
