सर्लाहीको लालबन्दीस्थित छिमेक लघुवित्तको शाखामा लुटपाटका क्रममा लुटेराको चक्कु प्रहारबाट एक कर्मचारी घाइते भएका छन्। बिहीबार साँझ कार्यालय बन्द गर्ने क्रममा ५ देखि ६ जनाको समूहले अचानक प्रवेश गरी कर्मचारीमाथि आक्रमण गर्दै लुटपाट गरेको प्रहरीले जनाएको छ।
जिल्ला प्रहरी कार्यालय सर्लाहीका अनुसार लुटेरा समूहले कर्मचारीलाई कोठाभित्र थुनेर चक्कु प्रहार गरेको थियो। आक्रमणबाट घाइते भएका कर्मचारीको पाखुरामा चोट लागेको छ। उनको उपचार भइरहेको र अवस्था खतरामुक्त रहेको प्रहरीले जनाएको छ।
लुटेरा समूहले लघुवित्तबाट केही नगदसमेत लुटेर फरार भएको जनाइएको छ। घटनामा संलग्न व्यक्तिहरूको पहिचान खुल्न नसकेको र उनीहरूको खोजी कार्य तीव्र पारिएको जिल्ला प्रहरी कार्यालय सर्लाहीका प्रवक्ता तथा प्रहरी नायब उपरीक्षक (डीएसपी) सरोज राईले जानकारी दिएका छन्।
