झापा – नेकपा (एमाले)का अध्यक्ष केपी शर्मा ओली आफ्नो निर्वाचन क्षेत्र झापा–५मा एक साता बस्ने कार्यक्रमसहित आइपुगेका छन्। आज चन्द्रगढी विमानस्थलमा उत्रिएपछि उनी बिर्तामोड हुँदै निर्वाचन क्षेत्र–५ पुगेका थिए।
उनी विमानस्थलमा प्रतिनिधि सभाका निवर्तमान सभामुख देवराज घिमिरे लगायत एमालेका नेताहरू र कार्यकर्ताहरूले स्वागत गरेका थिए। सञ्चारकर्मीहरूसँग संक्षिप्त कुरा गर्दै अध्यक्ष ओलीले झापामा भइरहेको निर्वाचन तयारीबारे सुझाव मागे।
अध्यक्ष ओलीले शान्ति सुरक्षाको अवस्था र निर्वाचन वातावरणबारे पत्रकारहरूको प्रतिक्रिया सुनेपछि कार्यकर्ताहरुलाई अपिल गर्दै भने, “देश अहिले विषम परिस्थितिमा छ। देशलाई जोगाउन आवश्यक छ कि झापा एमालेमय र समग्र देश एमालेमय बनोस्।” उनले यसपटक झापालाई आफूले ‘ओलीमय’ बनाउने दाबी पनि गरे।
एमाले अध्यक्ष ओली यसअघि माघ ५ गते प्रतिनिधि सभा निर्वाचनको मनोनयन दर्ता गराउन झापा आएका थिए र माघ ९ गते काठमाडौँ फर्किएका थिए। यसपटक उनले झापा–५मा एक साता बस्ने कार्यक्रम तय गरेका छन्।
एमाले झापा सचिव तुलसी कार्कीका अनुसार, अध्यक्ष ओली भोली र पर्सी कमल गाउँपालिका केन्द्रित भेटघाटमा रहनेछन्। उनले भने, “कार्यक्रम पालिका केन्द्रित छन् र भेटघाटलाई प्राथमिकता दिइएको छ।”
