काठमाडौं – आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै नेपाल–भारत सीमा नाका मतदानभन्दा ७२ घण्टा अगावै बन्द गरिने निर्णय गरिएको छ।
यो निर्णय मोरङको विराटनगरमा माघ २३ गते सम्पन्न सशस्त्र प्रहरी बल नेपाल र भारतीय सशस्त्र सीमा बल (एसएसबी)बीच भएको १६औँ डीआईजीस्तरीय समन्वय बैठकले गरेको हो। सशस्त्र प्रहरी बलका प्रवक्ता सशस्त्र प्रहरी नायब महानिरीक्षक विष्णुप्रसाद भट्टका अनुसार निर्वाचन अवधिमा सीमा सुरक्षा कडा पार्दै अवाञ्छित गतिविधि नियन्त्रण गर्न सीमा नाका अस्थायी रूपमा बन्द गरिनेछ।
बैठकमा सीमा सुरक्षा सुदृढीकरण, सूचनाको आदानप्रदान, तेस्रो मुलुकका नागरिकको अवैध प्रवेश नियन्त्रण, मानव बेचबिखन, नक्कली मुद्रा, हातहतियार तथा लागुऔषध ओसारपसार रोकथामलगायत विषयमा विस्तृत छलफल भएको थियो। साथै, सीमा स्तम्भ संरक्षण, संयुक्त गस्ती सञ्चालन, यात्रु सहजीकरण, विपद् उद्धार अभ्यास तथा आपसी समन्वयलाई थप प्रभावकारी बनाउने विषयमा समेत सहमति भएको जनाइएको छ।
सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार सीमा क्षेत्रका संवेदनशील नाकाहरू पहिचान गरी निगरानी बढाइने, आवश्यक स्थानमा जाँच कडाइ गरिने र ब्यारिकेड राखिनेछ। साथै, शरणार्थी तथा आप्रवासीहरूको गतिविधिमा निगरानी राख्दै आपराधिक घुसपैठ नियन्त्रण गरिनेछ। सीमा क्षेत्रमा मादक पदार्थको बिक्री तथा सेवनमा समेत कडाइ गरिने बताइएको छ।
बैठकमा सशस्त्र प्रहरी बल नेपाल नं. १ बराह बाहिनी मुख्यालयका बाहिनीपति सशस्त्र प्रहरी नायब महानिरीक्षक कुमार न्यौपानेले नेपाल–भारत सीमा केवल भौगोलिक रेखा मात्र नभई दुई देशबीचको मित्रताको प्रतीक भएको बताए। भारतीय एसएसबीका डीआईजी सरोजकुमार ठाकुरले सीमा क्षेत्रलाई अझ सुरक्षित र व्यवस्थित बनाउने प्रतिबद्धता व्यक्त गरे।
बैठकमा सशस्त्र प्रहरी बल नेपालका उच्च अधिकारीहरू तथा भारतीय एसएसबीका प्रतिनिधिहरूको उपस्थिति रहेको थियो।
