रामजी यादव
२४ माघ, वीरगंज (पर्सा)
जनता समाजवादी पार्टी (जसपा) नेपालले पर्सा निर्वाचन क्षेत्र नं. १ मा आगामी प्रतिनिधिसभा निर्वाचनलाई लक्षित गर्दै घरदैलो अभियानलाई पहिलो प्राथमिकतामा राखेको जनाएको छ। पार्टीका तर्फबाट प्रतिनिधिसभा सदस्य पदका उम्मेदवार रामनरेश यादवले जनताको समस्या बुझ्न र प्रत्यक्ष संवाद स्थापित गर्न घरदैलो कार्यक्रमलाई तीव्रता दिएका हुन्।
उम्मेदवार यादवले चुनावी अभियानका क्रममा क्षेत्रका विभिन्न बस्ती र टोलमा पुगेर स्थानीय बासिन्दासँग भेटघाट गर्दै उनीहरूको दुःख, सुख र समस्याबारे जानकारी लिइरहेका छन्। उनले जनताको समस्या नै आफ्नो समस्या भएको उल्लेख गर्दै समाधानका लागि आफू प्रतिबद्ध रहेको बताएका छन्। घरदैलो अभियानले मतदातासँग नजिकको सम्बन्ध स्थापित गर्नुका साथै जनविश्वास जित्न महत्वपूर्ण भूमिका खेलेको उनले बताए।
अभियानका क्रममा उम्मेदवार यादवले युवापुस्तासँग आत्मीयता साटासाट गर्नुका साथै ज्येष्ठ नागरिकहरूबाट आशीर्वाद ग्रहण गरेका छन्। उनले फागुन २१ गते हुने प्रतिनिधिसभा निर्वाचनलाई ऐतिहासिक अवसरको रूपमा उल्लेख गर्दै मधेश र मधेशी समुदायको अधिकार र पहिचान सुदृढ गर्न आफ्नो विजय आवश्यक रहेको धारणा व्यक्त गरे।
उक्त घरदैलो अभियानमा जसपा नेपालका केन्द्रीय महासचिव लालबाबु राउत गद्दी, केन्द्रीय सदस्य शशीकपुर मियाँ, जिल्ला सचिव रितेश गुप्ता, नगर अध्यक्ष घनश्याम बाबु गुप्ता लगायतका नेता तथा कार्यकर्ताहरूको उल्लेखनीय सहभागिता रहेको थियो।
जसपा नेपालले पर्सा क्षेत्र नं. १ मा चुनावी अभियानलाई थप प्रभावकारी बनाउँदै जनतासँग प्रत्यक्ष सम्पर्क विस्तार गर्ने रणनीति अपनाएको जनाएको छ।
