मकवानपुर, माघ २५ गते । हेटौँडास्थित आन्तरिक राजस्व कार्यालयले गत महिनामा ८० करोड आठ लाख ९९ हजार रुपैयाँ राजस्व सङ्कलन गरेको जनाएको छ।
कार्यालयका अनुसार चालु आर्थिक वर्ष २०८२/८३ को पहिलो छ महिनामा कुल तीन अर्ब २७ करोड ९२ लाख ३२ हजार रुपैयाँ राजस्व सङ्कलन गरिएको छ, जुन अघिल्लो आर्थिक वर्षको सोही अवधिको तुलनामा आठ करोड ८६ लाख १० हजार रुपैयाँले बढी हो।
उक्त अवधिमा अन्तःशुल्कबाट एक अर्ब ८८ करोड ६४ लाख ८७ हजार, आयकरबाट ५९ करोड ३२ लाख ७१ हजार, मूल्य अभिवृद्धि कर (भ्याट) बाट ४६ करोड ७१ लाख ३० हजार, स्वास्थ्य जोखिम करबाट २७ करोड ७३ लाख दुई हजार, ब्याजबाट तीन करोड ६९ लाख ४७ हजार तथा बहाल करबाट ८१ लाख २६ हजार रुपैयाँ राजस्व सङ्कलन भएको कार्यालय प्रमुख युक्तप्रसाद सुवेदीले जानकारी दिनुभयो।
गत आर्थिक वर्षको सोही अवधिमा तीन अर्ब १९ करोड छ लाख २२ हजार रुपैयाँ राजस्व सङ्कलन भएको थियो। हाल कार्यालयमा आयकरतर्फ ३३ हजार ५९६, मूल्य अभिवृद्धि करतर्फ पाँच हजार ८४९, अन्तःशुल्कतर्फ एक हजार ५९८, विथहोल्डिङतर्फ ७११ र व्यक्तिगततर्फ ८१ हजार ८१२ करदाता सूचीकृत रहेका छन्।
कर दाखिला नगर्ने तथा ढिलाइ गर्ने करदातालाई लक्षित गरी घरदैलो अभियान, टेलिफोन र एसएमएसमार्फत ताकेता तथा करसम्बन्धी सचेतना कार्यक्रम सञ्चालन गरिएको कार्यालयले जनाएको छ। यस्ता अभियानमार्फत हालसम्म करिब १० करोड रुपैयाँ बक्यौता असुली गरिएको प्रमुख सुवेदीले बताउनुभयो।
