इटहरी । श्रीकृष्णा प्रणामी प्रतिष्ठान नेपाल मुक्तिधाम, इटहरीको ४७औँ वार्षिकोत्सवका अवसरमा आयोजित मंगल राधिका सदानन्द प्रणामी अस्पतालद्वारा सञ्चालित मानव कल्याण आरोग्य ज्ञानमहायज्ञ भव्य रूपमा सम्पन्न भएको छ। आध्यात्मिक जागरण, मानव कल्याण तथा स्वास्थ्य सचेतनालाई केन्द्रमा राखेर आयोजना गरिएको उक्त कार्यक्रम भक्तजनका लागि विशेष महत्वको अवसर बनेको थियो।
कार्यक्रममा काठमाडौंबाट पूज्य मोहनीका महाराजा गुरु लाई भब्य रुपमा स्वागत गर्दै माया को चिनो प्रदान गरेको थियो भने सिक्किमबाट पधार्नु भएका कथावाचक पूज्य रोहित राज महाराजा जीले आफ्नो प्रवचनमार्फत भक्तजनलाई आध्यात्मिक ज्ञान प्रदान गर्नुभएको थियो। उहाँहरूको प्रेरणादायी प्रवचनले कार्यक्रममा उपस्थित सम्पूर्ण श्रद्धालुहरूलाई आध्यात्मिक ऊर्जा र मार्गदर्शन प्रदान गरेको थियो।
उक्त अवसरमा देशका विभिन्न स्थानबाट पधार्नु भएका गुरुजन, साधु–सन्त, धर्मप्रेमी तथा श्रद्धालु भक्तजनहरूको उल्लेखनीय उपस्थिति रहेको थियो। कार्यक्रममा भजन–कीर्तन, प्रवचन तथा धार्मिक अनुष्ठानहरू सञ्चालन गरिएका थिए, जसले सम्पूर्ण वातावरणलाई भक्तिमय र आध्यात्मिक बनाएको थियो।
प्रतिष्ठानले विगतदेखि नै धर्म, शिक्षा, स्वास्थ्य तथा मानव सेवाका क्षेत्रमा महत्वपूर्ण योगदान पुर्याउँदै आएको छ। विशेष गरी मंगल राधिका सदानन्द प्रणामी अस्पतालमार्फत स्वास्थ्य सेवा तथा जनकल्याणका विभिन्न कार्यक्रम सञ्चालन गर्दै समाजमा सकारात्मक सन्देश प्रवाह गर्दै आएको छ।
यस प्रकारका धार्मिक तथा आध्यात्मिक कार्यक्रमले समाजमा नैतिकता, सद्भाव, सहिष्णुता र मानव सेवाको भावना अभिवृद्धि गर्न महत्वपूर्ण भूमिका खेल्ने विश्वास आयोजकले व्यक्त गरेका छन्। कार्यक्रमको सफल आयोजनाले इटहरी क्षेत्रलाई धार्मिक तथा आध्यात्मिक केन्द्रका रूपमा थप पहिचान दिलाएको सहभागीहरूले बताएका छन्।
