काठमाडौँ क्षेत्र नं. ६ का प्रतिनिधिसभा सदस्य उम्मेदवार अमन मास्के आज बिहानैदेखि टोखा नगरपालिकाका विभिन्न वडामा घरदैलो अभियानमा सक्रिय रहनुभएको छ। उहाँले स्थानीय बासिन्दासँग प्रत्यक्ष भेटघाट गर्दै उनीहरूका समस्या, गुनासा र सुझाव सुन्नुका साथै आफ्नो चुनावी एजेन्डाबारे जानकारी गराइरहनुभएको छ।
घरदैलो कार्यक्रमका क्रममा मास्केले सडक स्तरोन्नति, खानेपानी व्यवस्थापन, ढल निकास, शिक्षा तथा स्वास्थ्य सेवाको पहुँच विस्तारजस्ता विषयलाई प्राथमिकतामा राख्ने प्रतिबद्धता व्यक्त गर्नुभएको छ। साथै युवाका लागि रोजगारी सिर्जना, सीपमूलक तालिम र उद्यमशीलता प्रवर्द्धनका कार्यक्रमलाई अगाडि बढाउने योजना पनि उहाँले सार्वजनिक गर्नुभएको छ।
स्थानीयवासीले विकास निर्माणको गति बढाउन, पारदर्शी र जवाफदेही नेतृत्व आवश्यक रहेको धारणा राखेका छन्। सो अवसरमा मास्केले जनताको विश्वासलाई बलियो आधार बनाएर क्षेत्रको समग्र विकासका लागि आफू प्रतिबद्ध रहेको बताउनुभएको छ।
उहाँको घरदैलो अभियानमा स्थानीय समर्थक तथा कार्यकर्ताको उल्लेखनीय सहभागिता देखिएको छ। निर्वाचन नजिकिँदै जाँदा क्षेत्र नं. ६ मा चुनावी गतिविधि थप सक्रिय बन्दै गएको छ।
