१५ फागुन, काठमाडौं।
नेपाल पुलिस क्लब जय ट्रफी क्रिकेट प्रतियोगिताको फाइनलमा प्रवेश गरेको छ। शुक्रबार सम्पन्न लिग चरणको अन्तिम खेलमा बागमती प्रदेशलाई पराजित गर्दै पुलिसले उपाधि यात्रा तय गरेको हो।
बागमतीले दोस्रो इनिङमा दिएको ८९ रनको लक्ष्य पुलिसले तेस्रो सत्रमा २ विकेट गुमाएर सहजै पूरा गर्यो। पुलिसका लागि सोहेल कुँवरले अविजित ३५ रन बनाए। शंकर रानाले २७ रन जोडे भने करण केसी २५ रनमा अविजित रहे।
बागमतीका रिजन ढकाल र सन्दीप लामिछानेले समान १–१ विकेट लिए।
यसअघि, पुलिसले पहिलो इनिङमा बनाएको १४९ रनको अग्रता पछ्याउँदै बागमती दोस्रो इनिङमा २३७ रनमै अलआउट भयो। इशान पाण्डेले सर्वाधिक ८० रन बनाए भने बिबेक मगरले ४५ रन जोडे। सूर्य तामाङ ३० रनमा अविजित रहे।
पुलिसका ललित राजवंशीले २६.२ ओभरमा ८४ रन खर्चेर ५ विकेट लिए। राशिद खानले ३ तथा करण केसीले १ विकेट हात पारे।
खेलमा टस हारेर पहिले ब्याटिङ गरेको बागमती पहिलो इनिङमा ५३.५ ओभरमा १८५ रनमै समेटिएको थियो। ८४–८ को कठिन अवस्थाबाट बिपिन आचार्य (अविजित ४६), सूर्य तामाङ (२४) र गौतम केसी (२१) ले टोलीलाई सम्मानजनक योगफलतर्फ पुर्याएका थिए। इशान पाण्डेले ४१ रन जोडेका थिए।
पुलिसका करण केसीले १३ ओभरमा २७ रन दिँदै ४ विकेट लिए। ललित राजवंशीले ३ विकेट लिए भने सागर ढकाल, राशिद खान र कुशल भुर्तेलले समान १–१ विकेट लिए।
जवाफमा पुलिसले पहिलो इनिङमा ७० ओभरमा ३३४–८ को अवस्थामा इनिङ घोषणा गर्दै १४९ रनको अग्रता बनाएको थियो। कुशल भुर्तेल ९६ रनमा नजिकै शतकबाट चुके। आरिफ शेखले ५३, दिल्साद अलीले ५१ तथा शंकर रानाले ४८ रन बनाए। अमित श्रेष्ठले ३९ रन जोडे भने करण केसी २९ रनमा अविजित रहे।
लिग चरणमा पुलिसले दुई खेल जित्दै एक खेलमा हार बेहोरेको थियो। अब पुलिसले उपाधिका लागि नेपाल आर्मी क्लबसँग प्रतिस्पर्धा गर्नेछ।
