चितवनमा निर्वाचन आचारसंहिता विपरीत गतिविधि गरेको आरोपमा दुई जना पक्राउ परेका छन्।
भरतपुर महानगरपालिका–१० स्थित नारायणी नमुना मावि मतदान केन्द्रअगाडि निर्वाचनविरोधी पर्चा–पम्प्लेट प्रदर्शन गरिएको सूचनापछि प्रहरीले मध्याह्न १२ बजेतिर उनीहरूलाई नियन्त्रणमा लिएको हो।
पक्राउ पर्नेमा धादिङ गल्छी गाउँपालिका–१ घर भई हाल भरतपुर महानगरपालिका–७ बसोबास गर्दै आएका २९ वर्षीय सुमन श्रेष्ठ तथा कालिका नगरपालिका–४ पदमपुर घर भई भरतपुर–१० बस्ने २१ वर्षीय किरण गौतम रहेका छन्।
प्रहरीका अनुसार श्रेष्ठ नेकपा बहुमतका चितवन जिल्ला सेक्रेटरी र गौतम सोही दलनिकट विद्यार्थी संगठनका जिल्ला संयोजक हुन्। उनीहरूको साथबाट एक थान मोबाइल तथा निर्वाचनविरोधी पर्चा–पम्प्लेट बरामद गरिएको छ। घटनाबारे थप अनुसन्धान भइरहेको जिल्ला प्रहरी कार्यालयले जनाएको छ।
