गृहमन्त्री ओमप्रकाश अर्यालसहित उच्च अधिकारीहरूको टोलीले काठमाडौं उपत्यकाका विभिन्न मतदान स्थलको अनुगमन गरेका छन्। उनीहरूमध्ये गृह सचिव राजकुमार श्रेष्ठ, सुरक्षा निकाय प्रमुख र गृहमन्त्रालयका अन्य उच्च अधिकारीहरू सहभागी थिए।
मन्त्री अर्यालले प्रतिनिधिसभा सदस्य निर्वाचनअन्तर्गत ललितपुर क्षेत्र नं ३ मा मतदान गरेलगत्तै काठमाडौं र ललितपुरका मतदान स्थलको निरीक्षण तथा अनुगमन गरेका हुन्। उनले मतदातासँग प्रत्यक्ष संवाद गर्दै मतदान स्थलको अवस्था सम्बन्धमा जानकारी लिएका थिए।
अनुगमनको क्रममा सानेपास्थित टीका विद्याश्रम मावि, तारकेश्वरको नागर्जुन मावि, पृथ्वीनारायण मावि, बालुवाटारको श्री पञ्चकन्या आधारभूत विद्यालय र सशस्त्र प्रहरी बलको मुख्यालयमा रहेको केन्द्रीय निर्वाचन सेल निरीक्षण गरिएको थियो।
टोलीमा प्रहरी महानिरीक्षक दानबहादुर कार्की, सशस्त्र प्रहरी महानिरीक्षक राजु अर्याल, राष्ट्रिय अनुसन्धान विभागका प्रमुख टेकेन्द्र कार्की, नेपाली सेनाका बलाधिकृत रथि प्रदीपजंघ केसी, गृहमन्त्रालयको सुरक्षा तथा समन्वय महाशाखाका प्रमुख एवं प्रवक्ता आनन्द काफ्ले लगायत सहभागी थिए।
अनुगमनपछि गृहमन्त्री अर्यालले प्रधानमन्त्री निवास बालुवाटार पुगेर प्रधानमन्त्री सुशीला कार्कीलाई निर्वाचन सुरक्षासम्बन्धी ब्रिफिङ दिएका छन्। उनले गृहमन्त्रालयको कन्ट्रोलमा बसेर सम्पूर्ण निर्वाचन क्षेत्रको निगरानी गरिरहेका छन्।
