काठमाडौं । काठमाडौं महानगरपालिका–१० थापागाउँमा ‘श्रीटेल होलिडेज’ नामक ट्राभल एजेन्सी सञ्चालन गरी सर्वसाधारणलाई ठगी गरेको आरोपमा प्रहरीले ७ जनालाई पक्राउ गरेको छ। पक्राउ पर्नेमा ६ जना भारतीय र १ जना नेपाली नागरिक रहेका छन्।
सर्वसाधारणलाई युरोप, एसिया र अफ्रिकासहित १७५ देशमा पर्यटक भिसामा घुम्न पठाउने ‘प्याकेज अफर’ देखाएर आरोपीहरूले ठगी गरेका हुन्। उपत्यका अपराध अनुसन्धान कार्यालय को टोलीले चैत ३ गते थापागाउँस्थित कार्यालयमा छापा मारेर उनीहरूलाई पक्राउ गरेको हो।
पक्राउ पर्नेमा सप्तरी कञ्चनरुपका २६ वर्षीय विवेक रेग्मी, भारतका ३९ वर्षीय हुसेन सैयद, ४४ वर्षीय साजिद ओमर सैयद, ३४ वर्षीय महम्मद इमरान, ३३ वर्षीय मिर खालिद हुसेन, ४० वर्षीय रजाक महम्मद र ४२ वर्षीय समादा गिरी रहेका छन्। विवेक रेग्मी बाहेक अन्य सबै भारतीय नागरिक हुन्।
अनुसन्धानका अनुसार आरोपीहरूले करिब २ करोड ७२ लाख रुपैयाँ असुलेका छन्। कार्यालयका एसपी मनोहर भट्टका अनुसार उनीहरूले काठमाडौँ उपत्यकाका विभिन्न सपिङ मलहरूमा ‘ट्राभल डेस्क’ राखी सर्वसाधारणलाई फारम भराएर विवरण सङ्कलन गर्ने गर्थे।
१७५ देशको आकर्षक प्याकेज अफर देखाउँदै ‘खाना–बस्न पैसा लाग्दैन, चिट्ठा परेपछि जानकारी दिइन्छ’ भन्दै उनीहरूले प्रलोभन दिने गरेका थिए। त्यसपछि फोनमार्फत ‘चिट्ठा परेको’ भन्दै कार्यालयमा बोलाएर ७ दिन, १० दिनदेखि ५ वर्षसम्मका प्याकेज देखाई रकम असुल्ने र सम्झौता अनुसार सेवा नदिई ठगी गर्ने गरिएको प्रहरीले जनाएको छ।
उक्त ट्राभल एजेन्सी सरकारी स्वीकृतिबिना सञ्चालन भइरहेको पनि खुलेको छ। पक्राउ परेकाहरूलाई थप अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ।
उनीहरूविरुद्ध ३२८ जना पीडितहरूले उजुरी दिएका छन्।
