धनगढी । धनगढी क्षेत्रमा मठ–मन्दिरको संरक्षण तथा शान्ति–सुरक्षा व्यवस्थापनलाई प्राथमिकतामा राख्दै प्रमुख जिल्ला अधिकारी हिरालाल रेग्मी सक्रिय रूपमा खटिँदै आएका छन्। धार्मिक क्षेत्रप्रति संवेदनशीलता र जनताको सुरक्षामा देखिएको दृढताका कारण उहाँप्रति स्थानीय स्तरमा सकारात्मक धारणा विकसित हुँदै गएको छ।
प्रमुख जिल्ला अधिकारी रेग्मीले लामो समयदेखि आफ्नो जिम्मेवारी इमान्दारितापूर्वक निर्वाह गर्दै आएका छन्। उहाँको कार्यशैलीमा स्पष्टता, अनुशासन र जनउत्तरदायित्व देखिने भएकाले छोटो समयमै सर्वसाधारणको विश्वास जित्न सफल भएको स्थानीयहरू बताउँछन्।
यसैबीच, कुमार भट्टराई सँग भएको भेटघाटका क्रममा धार्मिक क्षेत्रको संरक्षण, शान्ति–सुरक्षा व्यवस्थापन तथा जनताले भोगिरहेका समस्याबारे विस्तृत छलफल भएको थियो। उक्त अवसरमा प्रमुख जिल्ला अधिकारी रेग्मीले धर्मगुरुहरूको भूमिका, सामाजिक सद्भाव कायम गर्ने उपाय तथा सुरक्षा चुनौतीबारे स्पष्ट र तथ्यपरक धारणा राख्नुभएको थियो।
छलफलका क्रममा उहाँले जनताको हितलाई केन्द्रमा राखेर व्यवहारिक र लाभदायक समाधानहरू प्रस्तुत गर्नुभएको सञ्चारकर्मी भट्टराईले जानकारी दिनुभयो। उहाँका अनुसार, रेग्मीले उठाउनुभएका विषयहरू औपचारिकभन्दा बढी व्यवहारिक र कार्यान्वयनयोग्य रहेका थिए।
प्रशासनिक नेतृत्वमा दृढता, जनतासँगको सहकार्य र समस्याप्रति संवेदनशील दृष्टिकोणका कारण प्रमुख जिल्ला अधिकारी रेग्मी प्रभावकारी प्रशासकका रूपमा स्थापित हुँदै गइरहेको देखिन्छ। स्थानीय तहमा शान्ति–सुरक्षा कायम राख्न तथा धार्मिक क्षेत्रको संरक्षणमा उहाँको पहललाई सराहनीय रूपमा हेरिएको छ।
शनि कुमार यादव
