गलकोट — चैतेदसैँको अवसरमा बागलुङस्थित कालिका भगवती मन्दिरमा यस वर्ष रु ३७ लाखभन्दा बढी भेटी सङ्कलन भएको छ। कालिका गुठी व्यवस्थापन समितिका अनुसार नवरात्र अवधिभर कुल रु ३७ लाख २५ हजार ५५५ भेटी प्राप्त भएको हो। गत वर्षको तुलनामा यस वर्ष करिब रु पाँच लाखले कमी आएको जनाइएको छ। अघिल्लो वर्ष चैतेदसैँमा रु ४२ लाख भेटी सङ्कलन भएको थियो।
गण्डकी प्रदेशकै प्रमुख शक्तिपीठमध्ये पर्ने ऐतिहासिक बागलुङ कालिका मन्दिरमा यस वर्ष चैतेदसैँभर सात लाखभन्दा बढी भक्तजनले दर्शन गरी भेटी चढाएका थिए। समितिका अध्यक्ष भूपेन्द्र खड्काका अनुसार नवरात्रको पहिलो दिन चैत ५ गते रु १ लाख १७ हजारदेखि सुरु भएर क्रमशः चैत ६ गते रु १ लाख ५३ हजार, चैत ७ गते रु ४ लाख ३८ हजार, चैत ८ गते रु १ लाख ७० हजार, चैत ९ गते रु १ लाख ७१ हजार र चैत १० गते रु ४ लाख ९२ हजार सङ्कलन भएको थियो।
त्यसैगरी चैत ११ गते रु ३ लाख, मुख्य दिन चैत १२ गते सबैभन्दा धेरै रु १० लाख ४४ हजार भेटी सङ्कलन भएको थियो। नवमीका दिन रु ४ लाख ८० हजार र दशमीमा रु ३ लाख ५५ हजार ७३५ उठेको समितिले जनाएको छ।
अध्यक्ष खड्काका अनुसार मुख्य दिनमा सबैभन्दा बढी भक्तजनको भीड लागेको थियो भने अष्टमीका दिन मात्रै चार लाखभन्दा बढी श्रद्धालु आएका कारण ट्राफिक व्यवस्थापनमा समेत चुनौती भएको थियो। वर्षाका कारण केही भक्तजनको सङ्ख्यामा कमी आउँदा भेटी पनि केही घटेको उनले बताए।
उक्त मन्दिरमा वडा दसैँ, चैतेदसैँ तथा हरेक शनिबार र मंगलबार विशेष पूजाआजा हुने गर्दछ। अक्षता, बोका तथा कुखुराको टाउको, परेवा उडाउने शुल्क, विवाह तथा व्रतबन्ध सेवा र पण्डितबाट बुझाइने दस्तुरबाट मन्दिरको आम्दानी हुने गरेको छ।
ऐतिहासिक रूपमा विसं १५९१ मा पर्वतका राजा प्रतापीनारायण सिंह मल्लले पाल्पाका राजा मनिमुकुन्द सेनकी छोरीसँग विवाह गर्दा राजकुमारीले दाइजोका रूपमा ल्याएको कालिका देवीको मूर्ति यही स्थानमा स्थापना गरिएको मानिन्छ। सोही मूर्तिलाई अहिलेको कालिका मन्दिरमा प्रतिष्ठापित गरी पूजा हुँदै आएको छ।
