काठमाडौं — गृहमन्त्री सुधन गुरुङले विपद्मा परेका नागरिकको शीघ्र उद्धार सुनिश्चित गर्न दुई वटा हेलिकप्टर सधैं तयारी अवस्थामा राखिने बताएका छन्। चैत १७ गते सशस्त्र प्रहरी बल नेपाल प्रधान कार्यालयको निरीक्षणका क्रममा उनले यस्तो बताएका हुन्।
विपद् व्यवस्थापनमा सशस्त्र प्रहरीले ज्यानको जोखिम मोलेर नागरिक उद्धारमा खटिएकोप्रति आभार व्यक्त गर्दै मन्त्री गुरुङले नागरिकको जीवनभन्दा ठूलो कुनै कुरा नभएको उल्लेख गरे। उनले आपतकालीन अवस्थामा सेवा र सुरक्षामा कुनै कमी नआउने गरी गृहमन्त्रालय र सुरक्षा निकायलाई उच्च सतर्कतामा रहन निर्देशन दिए।
विगतमा सशस्त्र प्रहरीको विपद् व्यवस्थापन तालिम शिक्षालय कुरिनटारमा तालिम लिएको स्मरण गर्दै उनले कोभिड–१९ महामारी तथा सीमा सुरक्षाका काममा आफूले सुरक्षा निकायसँग नजिकबाट सहकार्य गरिसकेको बताए। त्यसले सुरक्षाकर्मीको जिम्मेवारी र चुनौतीबारे आफू जानकार रहेको उनको भनाइ थियो।
मन्त्री गुरुङले विपद् सुरु हुनुअघि नै आवश्यक तयारी पूरा गर्न निर्देशन दिँदै सशस्त्र प्रहरीको जनशक्ति फिल्डमा केन्द्रित हुनुपर्ने बताए। साथै सीमा क्षेत्रमा हुने अवैध चोरीपैठारी तथा तस्करी नियन्त्रणमा मन्त्रालय कडाइका साथ अघि बढ्ने उल्लेख गरे।
सशस्त्र प्रहरीमा लामो समयसम्म एउटै पदमा काम गर्नुपर्ने अवस्थाको अन्त्य गर्न पहल गरिने जनाउँदै उनले सरुवा, बढुवा र सेवा सुविधामा पारदर्शिता कायम गरिने प्रतिबद्धता व्यक्त गरे।
कार्यक्रममा सशस्त्र प्रहरी महानिरीक्षक राजु अर्यालले मन्त्रीबाट प्राप्त निर्देशनले संगठनको मनोबल उच्च भएको बताउँदै कार्यक्षेत्रमा थप जिम्मेवार र परिणाममुखी बन्न प्रेरणा मिलेको बताए। उनले संगठनको कार्यक्षमता अभिवृद्धिका लागि पुराना नियमावली परिमार्जन आवश्यक रहेको पनि उल्लेख गरे।
त्यस्तै, तल्लो तहका कर्मचारीको जीवनयापन कठिन भएकाले उनीहरूको परिवारको शिक्षा र स्वास्थ्यमा राज्यले विशेष ध्यान दिनुपर्ने उनको सुझाव थियो। कार्यक्रममा गृहसचिव राजकुमार श्रेष्ठसहित सशस्त्र प्रहरीका उच्च अधिकृतहरूको उपस्थिति रहेको थियो।
