यातायात व्यवस्था कार्यालय, महेन्द्रनगरले अब कार्यालय परिसरमा बिचौलियाको प्रवेश पूर्ण रूपमा निषेध गरेको छ। सेवाग्राहीलाई अनावश्यक दुःख, हैरानी र आर्थिक ठगी बढेको गुनासो आएपछि कार्यालयले औपचारिक सूचना जारी गर्दै यस्तो निर्णय गरेको हो।
कार्यालय प्रमुख रवीन्द्र चौधरीका अनुसार केही व्यक्तिहरूले सवारीसाधन बीमा, नवीकरण वा निरोगिता प्रमाणपत्र बनाइदिने भन्दै सेवाग्राहीलाई प्रलोभनमा पार्ने, अतिरिक्त रकम लिने र हैरानी दिने गरेको गुनासो कार्यालयमा पटक–पटक आएको छ। त्यसैले बिचौलियालाई कार्यालय प्रवेशमा रोक लगाइएको हो।
उनले थपे, यस प्रकारका गतिविधिले कार्यालय सेवा अव्यवस्थित र ढिला हुने भएकाले, निषेध गरिएको क्षेत्रमा प्रवेश गरी सेवाग्राहीलाई दुःख दिने व्यक्तिको कानुनबमोजिम कारबाही गरिनेछ।
कार्यालयले सेवाग्राहीलाई सीधै सम्बन्धित शाखा वा कर्मचारीसँग सम्पर्क गर्न आग्रह गरेको छ र कुनै पनि सेवा लिन बिचौलियाको आवश्यकता नभएको तथा तोकिएको शुल्क बाहेक अतिरिक्त रकम नतिर्न अनुरोध गरेको छ।
प्रमुख चौधरीका अनुसार, बिचौलिया नियन्त्रणपछि सेवाग्राहीले अनावश्यक झन्झट र खर्चबाट मुक्ति पाउने छन् र सेवा प्रवाह थप सुगम, छिटो र पारदर्शी हुने अपेक्षा गरिएको छ।
