नेपाली कम्युनिस्ट पार्टीले आन्तरिक र बाह्य कारणले निर्वाचनमा अस्वाभाविक परिणाम आएको निष्कर्ष निकालेको छ। आन्तरिक कारणमा सामाजिक रूपान्तरण नहुनु, संगठनात्मक समायोजन नहुनु, विचारधारात्मक कामको कमी, युवाहरूको कम सहभागिता, वामशक्ति एकताबद्ध नहुनु, परिवर्तनको महत्व बुझाउन नसक्नु, र भएका कामको प्रचार नहुनु रहेका छन्। यस्तै, सिद्धान्त र व्यवहारमा अन्तर, अवसरवादी प्रवृत्ति, व्यक्तिवादी कार्यशैली, प्राविधिक जनशक्ति र स्रोतको कमी, विकल्पका रूपमा प्रस्तुत हुन नसक्नुलाई पनि कारण मानिएको छ।
बाह्य कारणमा पुराना दलविरोधी अभियान, वामशक्तिमाथिको प्रहार, भूराजनीतिक तथा बाह्य शक्तिकेन्द्रको चलखेल, डिजिटल प्रचार, लोकप्रियतावादी शक्तिको प्रभाव, र विदेशमा बस्ने नेपालीको भूमिका रहेका छन्। नेकपाले यसलाई ‘असामान्य अवस्थामा भएको निर्वाचनको परिणाम’ भनेर विश्लेषण गरेको छ।
समीक्षामा पार्टीले प्रविधिको प्रभाव, परम्परागत संगठन र प्रचार शैलीले अब चुनाव जित्न नसक्ने, र अब चुनाव विचार र मुद्दामा नभई प्रविधिमा आधारित हुने देखिएको उल्लेख गरेको छ।
नेकपाले प्रभावकारी रचनात्मक प्रतिपक्षको भूमिका निर्वाह गर्ने, प्रदेश र स्थानीय तहमा जनपक्षीय काममा जोड दिने, तथा नेता र कार्यकर्ताको जीवनशैली र आचरण सुधार गर्ने योजना बनाएको छ। संगठन, वैचारिक, आर्थिक र प्राविधिक कामको ठोस कार्ययोजना बनाएर अगाडि बढ्ने तयारी छ।
यसअन्तर्गत पार्टी एकता राष्ट्रिय महाधिवेशन ६ महिनाभित्र सम्पन्न गर्ने, पालिका तहसम्मका सबै संगठन समायोजन वा नयाँ संगठन निर्माण गर्ने, तीन महिनाभित्र सबै वडामा संगठन निर्माण गर्ने, सदस्यता नवीकरण गर्ने र पाँच महिनाभित्र वडा, पालिका, जिल्ला र प्रदेश अधिवेशन सम्पन्न गर्ने योजना रहेको छ। साथसाथै नेतृत्वको पुनर्गठन, सैद्धान्तिक÷वैचारिक प्रशिक्षण अभियान सञ्चालन र व्यवस्थित पाठ्यक्रम निर्माण गर्ने तयारी पनि छ।
