वैदेशिक रोजगार विभागले श्रमिक ठगी गर्ने ३५२ म्यानपावर व्यवसायी र म्यानपावरमा कार्यरत कर्मचारीहरूको सूची सार्वजनिक गरेको छ। विभागकी महानिर्देशक मीरा आचार्यका अनुसार, ठगीमा परेका श्रमिकले दिएको उजुरीको आधारमा प्रारम्भिक अनुसन्धान गर्दा ठगी पुष्टि भएकाले आरोपितहरूको नाम, ठेगाना र ठगी रकम सार्वजनिक गरिएको हो। उनले भनिन्, “उजुरीपछि गरिएको प्रारम्भिक अनुसन्धानमा ठगी पुष्टि भएकाले संदिग्धहरूको नाम सार्वजनिक गरिएको हो। यीमध्ये कतिपयलाई अनुसन्धानको दायरामा ल्याउन अदालतबाट पक्राउ पुर्जी जारी भइसकेको छ भने केहीको पक्राउ पुर्जीका लागि अनुमति लिने काम भइरहेको छ।”
आचार्यले थप भनिन् कि विभागले श्रमिक ठगी गर्ने व्यवसायी र म्यानपावर कर्मचारीविरुद्ध कानुनी कारबाहीमा पनि सक्रियता बढाएको छ। “श्रमिक ठगेर व्यवसाय चलाउन खोज्नेविरुद्ध हामी निरन्तर कारबाही गरिरहेका छौँ। अब भने अलि एग्रेसिभ भएर अनुसन्धान र कारबाहीलाई अघि बढाउन लागिएको छ,” उनले स्पष्ट पारिन्।
उनले ठगीमा परेका श्रमिकलाई यथेष्ट प्रमाणसहित उजुरी दिन आग्रह गर्दै भनेकी छन् कि दिनहुँ उजुरीको चाप बढिरहेकोले थप कर्मचारी व्यवस्थापनका लागि श्रम, रोजगार तथा सामाजिक सुरक्षा मन्त्रालयसँग समन्वय भइरहेको छ। यसअन्तर्गत विभागले ठगीमा संलग्न सबै व्यवसायीलाई कानूनी दायरामा ल्याएर पीडित श्रमिकलाई न्याय दिलाउने प्रतिबद्धता व्यक्त गरेको छ।
