प्रधानमन्त्री कप एकदिवसीय राष्ट्रिय क्रिकेट प्रतियोगिता अन्तर्गत आज भएको खेलमा गण्डकी प्रदेशले कोशी प्रदेशलाई ३९ रनले पराजित गरेको छ।
वीरगञ्जको नारायणी रंगशालामा सुरु भएको खेलमा पहिले ब्याटिङ गरेको गण्डकी प्रदेशले निर्धारित ५० ओभरमा सात विकेट गुमाएर २२७ रन बनाएको थियो। गण्डकीका अर्जुन कुमालले १०२ रन बनाए भने विपिन खत्रीले ७६ रन योगदान गरे।
कोशी प्रदेशले जबाबी ब्याटिङमा ५० ओभरमा नौ विकेट गुमाउँदै १८८ रनमा मात्र समेटियो। कोशीका दिपेश कँडेलले ५२ रन र आशिष मगरले ३० रन जोडे। गण्डकीका सिव्रिन श्रेष्ठले तीन विकेट लिए भने अपराजित पौडेलले दुई विकेट लिए।
आजको खेलको उत्कृष्ट प्रदर्शनको आधारमा गण्डकी प्रदेशका अर्जुन कुमाललाई ‘म्यान अफ दि म्याच’ घोषणा गरिएको छ।
प्रतियोगितामा तीन विभागीय टोली—नेपाल पुलिस क्लब, त्रिभुवन आर्मी क्लब र नेपाल एपीएफ क्लब—सहित सात प्रदेशका टोली गरी जम्मा १० टोलीको सहभागिता रहेको छ। प्रतियोगिताको विजेता टोलीले १० लाख रुपैयाँ र उपविजेताले ५ लाख रुपैयाँ पुरस्कार प्राप्त गर्नेछन्।
