काठमाडौँ। इन्डियन प्रिमियर लिग (IPL) २०२६ अन्तर्गत सोमबार भएको खेलमा सनराइजर्स हैदराबादले राजस्थान रोयल्सलाई ५७ रनको फराकिलो अन्तरले पराजित गरेको छ।
हैदराबादस्थित राजीव गान्धी अन्तर्राष्ट्रिय रंगशालामा टस हारेर पहिले ब्याटिङ गरेको घरेलु टोली सनराइजर्स हैदराबादले निर्धारित २० ओभरमा ६ विकेट गुमाउँदै २१६ रनको विशाल योगफल खडा गरेको थियो।
टोलीका कप्तान इशान किशनले उत्कृष्ट प्रदर्शन गर्दै मात्र ४४ बलमा ८ चौका र ६ छक्काको मद्दतले ९१ रनको विस्फोटक इनिङ खेले। त्यस्तै हेनरिक क्लासेनले ४० रन र नितीश कुमार रेड्डीले २८ रनको योगदान दिएपछि हैदराबादले बलियो लक्ष्य प्रस्तुत गरेको हो। राजस्थान रोयल्सका लागि जोफ्रा आर्चरले २ विकेट लिए।
बलिङतर्फ हैदराबादका प्रफुल हिन्ज र साकिब हुसैनले उत्कृष्ट प्रदर्शन गर्दै विपक्षी ब्याटिङ लाइनअप ध्वस्त पारे।
२१७ रनको विशाल लक्ष्य पछ्याउने क्रममा राजस्थान रोयल्सको सुरुवात नै कमजोर रह्यो। प्रफुल हिन्जले पहिलो ओभरमै आक्रामक बलिङ गर्दै महत्वपूर्ण विकेट लिँदा राजस्थान दबाबमा परेको थियो। टोली ९ रनमै ५ विकेट गुमाएर संकटमा पुगेको थियो।
मध्यक्रममा डोनोभन फरेरा (६९ रन) र रविन्द्र जडेजा (४५ रन) ले ११८ रनको साझेदारी गर्दै केही समय इनिङ सम्हाल्ने प्रयास गरे पनि जित दिलाउन सकेनन्। अन्ततः राजस्थान १९ ओभरमा सबै विकेट गुमाउँदै १५९ रनमा समेटियो।
हैदराबादका लागि डेब्युटेन्ट बलरहरू प्रफुल हिन्ज र साकिब हुसैनले समान ४–४ विकेट लिए। उत्कृष्ट प्रदर्शन गरेका प्रफुल हिन्ज ‘प्लेयर अफ द म्याच’ घोषित भए।
यो जितसँगै सनराइजर्स हैदराबादले आफ्नो दोस्रो जित दर्ता गरेको छ भने राजस्थान रोयल्सले सिजनको पहिलो हार व्यहोरेको छ।
