काठमाडौं। विराजभक्त श्रेष्ठले पदभार सम्हालेको दुई साताभित्र (चैत महिनामा) सम्पन्न प्रमुख कामहरूको विवरण सार्वजनिक गरेका छन्।
उनका अनुसार शासकीय सुधार कार्यसूची कार्यान्वयनका लागि मातहत निकाय परिचालन गरिएको छ भने सुशासन ऐनअनुसार सुशासन इकाइ गठन गरिएको छ। साथै, ‘डेलिभरीमा आधारित शासन प्रणाली’मार्फत कर्मचारी कार्यसम्पादन अनुगमन र स्रोतको सदुपयोगमा निगरानी बढाइएको छ।
विद्युत् हटलाइन ११५१ लाई प्रभावकारी बनाइएको र दुई सातामा प्राप्त ४,२६९ गुनासो शतप्रतिशत समाधान गरिएको मन्त्री श्रेष्ठले जानकारी दिएका छन्।
यस अवधिमा ऊर्जा निर्यात तथा खपत रणनीति तयारी समिति, अलपत्र आयोजना पुनरावलोकन समिति र ‘पेन्डिङ पीपीए’ टुंग्याउने समितिसमेत गठन गरिएको छ। ऊर्जा सम्बन्धी विभिन्न विधेयक आगामी संसद अधिवेशनमा पेश गर्ने तयारी रहेको जनाइएको छ।
मन्त्रालयका अनुसार शहीद परिवारलाई रोजगारी उपलब्ध गराउने प्रक्रिया अघि बढाइएको छ भने विश्व बैंकलगायत दातृ निकायसँग ठूला ऊर्जा आयोजनाबारे संवाद जारी छ।
साथै, प्रसारण लाइन विस्तार, ठूला जलविद्युत् आयोजना, तथा पूर्वाधार विकासका विभिन्न कामलाई तीव्रता दिइएको मन्त्री श्रेष्ठको सचिवालयले जनाएको छ।
