विराटनगरमा जारी ‘नोबेल विराट गोल्डकप’को ३८औँ संस्करणमा पूर्वविजेता झापा–११ फाइनलमा प्रवेश गरेको छ।
विराटनगरस्थित सहिद मैदानमा बुधबार सम्पन्न पहिलो सेमिफाइनल खेलमा विभागीय टोली नेपाल पुलिस क्लबलाई १–० गोल अन्तरले पराजित गर्दै झापाले उपाधि भिडन्त पक्का गरेको हो।
झापाको जितमा फागुराम थारूले गरेको एक मात्र गोल नै निर्णायक बन्यो। उनले खेलको ६७औँ मिनेटमा ‘सेकेन्ड बार’ नजिकबाट गरेको शक्तिशाली प्रहार जालीमा परिणत हुँदा झापाको जित सुनिश्चित भएको थियो।
यस जितसँगै झापाले १० वर्षअघिको हारको बदला पनि लिएको छ। २०७२ सालमा भएको विराट गोल्डकपको फाइनलमा झापा र पुलिसबीच भएको प्रतिस्पर्धामा पुलिसले १–० ले नै जित हासिल गरेको थियो। तर, एक दशकपछि सोही मैदानमा उही नतिजा उल्टाउँदै झापाले फाइनल यात्रा तय गरेको हो।
खेलको ‘प्लेयर अफ द म्याच’ झापा–११ का सोलोमन किङ घोषित भए। उनले नगद ११ हजार रुपैयाँ पुरस्कार प्राप्त गरे।
अब झापाले उपाधिका लागि बिहीबार हुने दोस्रो सेमिफाइनलको विजेतासँग प्रतिस्पर्धा गर्नेछ। दोस्रो सेमिफाइनलमा घरेलु टोली सम्राट स्पोर्ट्स क्लब र चर्च ब्वाइज युनाइटेडबीच प्रतिस्पर्धा हुनेछ। चर्च ब्वाइजले एपीएफ क्लबलाई १–० ले पराजित गर्दै अन्तिम चारमा स्थान बनाएको हो भने सम्राट स्पोर्ट्सले भारतको बिरसा मुण्डा स्पोर्ट्स एकेडेमीलाई ३–१ ले हराउँदै सेमिफाइनलमा स्थान सुरक्षित गरेको थियो।
प्रतियोगिताको विजेताले ११ लाख रुपैयाँ तथा उपविजेताले ५ लाख रुपैयाँ नगद पुरस्कार प्राप्त गर्नेछन्।
