मकवानपुर । हेटौँडा सिमेन्ट उद्योगमा कोइलाको मौज्दात सकिएपछि आज (वैशाख ३) बिहानदेखि उत्पादन पूर्ण रूपमा ठप्प भएको छ।
केही साताअघि मात्रै नियमित सञ्चालनमा फर्किएको उद्योग पुनः कच्चा पदार्थ अभावका कारण बन्द हुन पुगेको हो। उद्योग व्यवस्थापनले करिब तीन हजार मेट्रिकटन कोइला खरिदका लागि बोलपत्र आह्वान गरिसकेको जनाएको छ।
उद्योगका सहायक प्रबन्धक विकास श्रेष्ठका अनुसार करिब दुई हप्ताभित्र कोइला आइपुग्ने अपेक्षा गरिएको छ। कोइलाको गुणस्तर परीक्षणपछि मात्रै पुनः उत्पादन सुरु गर्ने समय निर्धारण गरिने उनले बताए।
