काठमाडौँ, ३ वैशाख । काठमाडौँ महानगरपालिकाकी कार्यवाहक प्रमुख सुनिता डंगोल र प्रहरी महानिरीक्षक दानबहादुर कार्कीबीच सडक सुरक्षा, सहरी सुरक्षा तथा सहरी व्यवस्थापनलाई प्रभावकारी बनाउन आपसी सहकार्य थप सुदृढ गर्ने सहमति भएको छ ।
भेटवार्तामा सडक सुरक्षा, ट्राफिक व्यवस्थापन, सार्वजनिक जग्गा संरक्षण, अव्यवस्थित बसोबास व्यवस्थापन तथा “सडक मानवमुक्त काठमाडौँ” अभियानलाई प्रभावकारी बनाउने विषयमा छलफल भएको थियो ।
कार्यवाहक प्रमुख डंगोलले महानगर प्रहरी बललाई नेपाल प्रहरीको सहयोगले अझ सशक्त बनाउँदै नागरिकले प्रत्यक्ष अनुभूति गर्ने परिवर्तन ल्याइने विश्वास व्यक्त गरिन् ।
प्रहरी महानिरीक्षक कार्कीले महानगरका गतिविधिमा आवश्यक समन्वय र सहयोग उपलब्ध गराइने बताउँदै उपत्यका प्रहरी कार्यालयमार्फत फोकल पर्सन तोकेर काम अघि बढाइने जानकारी दिए ।
छलफलमा लागुऔषध नियन्त्रण, सार्वजनिक स्थलमा धुमपान–मद्यपान नियन्त्रण, पार्किङ व्यवस्थापन, ट्राफिक सुधार तथा रात्रि–विहानी बस सेवाको सुरक्षाजस्ता विषय पनि समेटिएका थिए ।
