एकैदिन ५३ फर्ममा विभागको अनुगमन

काठमाडौँ । वाणिज्य, आपूर्ति तथा उपभोक्ता संरक्षण विभागले बजार अनुगमनलाई तीव्र बनाउँदै एकैदिन ५३ वटा व्यापारिक फर्ममा निरीक्षण गरेको छ ।

बिहीबार काठमाडौँको खिचापोखरी क्षेत्रमा गरिएको अनुगमनका क्रममा बिलबिजक जारी भए/नभएको, उपभोक्तालाई आवश्यक जानकारी प्रदान गरिए/नगरिएको तथा उपभोक्ता संरक्षण ऐन, २०७५ को पालना भए/नभएको विषयमा जाँच गरिएको विभागले जनाएको छ ।

अनुगमनका क्रममा सबै फर्महरूलाई सुधारात्मक निर्देशन दिइएको विभागले स्पष्ट पारेको छ । स्थानीय जनप्रतिनिधि, उपभोक्ता अधिकारकर्मी तथा सरोकारवालाहरूको उपस्थितिमा नियमित रूपमा बजार अनुगमन भइरहेको पनि विभागले जनाएको छ।