आमालाई जन्म दिने माताप्रति सम्मान, श्रद्धा र कृतज्ञता व्यक्त गर्ने पवित्र पर्व मातातीर्थ औंसी आज देशभर श्रद्धा र भक्तिपूर्वक मनाइँदैछ। वैशाख कृष्ण औंसीका दिन मनाइने यो पर्वलाई आमाप्रतिको सम्मान, माया र आशीर्वाद प्राप्त गर्ने विशेष दिनका रूपमा लिइन्छ।
शास्त्रीय मान्यताअनुसार आचार्य, उपाध्याय र पिताभन्दा पनि आमालाई उच्च स्थानमा राखिएको छ। आमाको माया, त्याग र समर्पणलाई स्मरण गर्दै यो दिन विशेष रूपमा आमालाई सम्मान गर्ने परम्परा रहिआएको छ। बिहानै उठेर स्नान गरी आमालाई नयाँ वस्त्र पहिर्याउने, मिठा–मिठा परिकार खुवाउने र आशीर्वाद लिने चलन छ।
आमा जीवित नभएकाहरूले आफ्ना दिवंगत आमाको सम्झनामा तर्पण, पिण्डदान तथा ब्राह्मण भोजन गराउने धार्मिक परम्परा पनि यस दिनमा विशेष रूपमा पालना गरिन्छ। यसले माताप्रतिको कृतज्ञता र श्रद्धालाई अझ गहिरो बनाउने विश्वास गरिन्छ।
यसै अवसरमा काठमाडौँको चन्द्रागिरि नगरपालिका–स्थित पवित्र तीर्थस्थल मातातीर्थमा आज विशेष मेला लागेको छ। बिहानैदेखि ठूलो संख्यामा भक्तजनहरूको घुइँचो लागिरहेको छ। भक्तजनहरूले मातातीर्थ कुण्डमा स्नान गरी आमाप्रति श्रद्धा व्यक्त गर्दै पूजा–अर्चना गरिरहेका छन्।
यो पर्वले आमाप्रतिको माया केवल एक दिन होइन, जीवनभर सम्मान, सेवा र कृतज्ञताका साथ व्यक्त गर्नुपर्ने सन्देश दिन्छ।
