काठमाडौं — गृहमन्त्री सुदन गुरुङ ले पक्राउपछि हुने अनुसन्धानका लागि कानुनले दिएको २५ दिनको समयसीमा अपुग भएको बताएका छन्। गृह मन्त्रालयमा आयोजित पत्रकार भेटघाटका क्रममा उनले यस्तो धारणा व्यक्त गरेका हुन्।
विशेषगरी पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक सँग सम्बन्धित अनुसन्धान सन्दर्भ उल्लेख गर्दै गुरुङले समयसीमाको व्यावहारिक कठिनाइ औंल्याए।
उनका अनुसार ज्यानसम्बन्धी कसुरमा अनुसन्धान गर्दा २५ दिनभित्रै सबै प्रक्रिया पूरा गरेर मुद्दा दर्ता गर्नुपर्ने बाध्यकारी व्यवस्था छ। तर, आवश्यक कागजी प्रक्रिया, पत्राचार र प्रमाण संकलनमै धेरै समय खर्च हुने भएकाले उक्त अवधि पर्याप्त नहुने उनको भनाइ छ।
“केही कागजी प्रक्रिया र पत्राचारमै २५ दिन बित्छ, त्यसैले अनुसन्धान पूरा गर्न समय अपुग हुन्छ,” उनले भने।
गुरुङको भनाइअनुसार ज्यानसम्बन्धी गम्भीर मुद्दामा गहिरो अनुसन्धान आवश्यक पर्ने भएकाले हालको समयसीमा व्यवहारतः चुनौतीपूर्ण देखिएको छ। ओली र लेखकसँग सम्बन्धित मुद्दामा पनि यही आधारमा अनुसन्धान भइरहेको बताइएको छ।
