काठमाडौं – ICC Women’s Challenge Trophy 2026 अन्तर्गत नेपाल महिला राष्ट्रिय क्रिकेट टोलीले आज आफ्नो पहिलो खेलमा अमेरिकासँग प्रतिस्पर्धा गर्दैछ। खेल Gahanga International Cricket Stadium मा साँझ ४:४५ बजे सुरु हुनेछ।
टी–२० अन्तर्राष्ट्रिय मान्यतासहित अमेरिकाविरुद्ध नेपालले पहिलो पटक खेल्न लागेको हो। यसअघि यी दुई टोलीबीच अभ्यास खेल भए पनि आधिकारिक टी–२०आई मान्यता प्राप्त थिएन। प्रतियोगितामा सहभागी अन्य टोलीहरूसँग पनि नेपालले पहिलो पटक टी–२०आई प्रतिस्पर्धा गर्दैछ।
अप्रिल १८ देखि मे १ सम्म सञ्चालन हुने प्रतियोगितामा आयोजक रुवान्डासहित नेपाल, अमेरिका, इटाली र भानुआतु सहभागी छन्। डबल राउण्ड रोबिन आधारमा खेलिने प्रतियोगितामा प्रत्येक टोलीले एक–अर्कासँग दुई–दुई पटक प्रतिस्पर्धा गर्नेछन्। अन्त्यमा सर्वाधिक अंक बटुल्ने टोली च्याम्पियन बन्नेछ।
नेपाल महिला टोली पहिलो पटक रुवान्डामा अन्तर्राष्ट्रिय प्रतियोगिता खेल्दैछ। International Cricket Council (आईसीसी) ले एसोसिएट राष्ट्रहरूलाई अवसर प्रदान गर्ने उद्देश्यले पहिलो पटक यस प्रतियोगिताको आयोजना गरेको हो।
वरियताको आधारमा नेपाल (२१औँ स्थान) प्रतियोगितामा सबैभन्दा माथिल्लो स्थानमा रहेको टोली हो। त्यसपछि इटाली (२३औँ), अमेरिका (२४औँ), रुवान्डा (२५औँ) र भानुआतु (३०औँ) स्थानमा छन्।
नेपालको आगामी खेल तालिका अनुसार दोस्रो खेल इटालीसँग, तेस्रो रुवान्डासँग, चौथो भानुआतुसँग हुनेछ। प्रतियोगिताभर नेपालले कुल आठ खेल खेल्नेछ।
नेपालको टोली :
इन्दु बर्मा (कप्तान), पूजा महतो, बिन्दु रावल, रुबिना क्षेत्री, रुबी पोदार, रोमा थापा, कविता जोशी, कविता कुँवर, सम्झना खड्का, अनु कडायत, सुमन विष्ट, रिया शर्मा, रचना चौधरी र मनिषा उपाध्याय।
