बागलुङ – भारतीय सरकारको आर्थिक सहयोगमा बडिगाड गाउँपालिका–७ भिमगिठेमा नयाँ स्वास्थ्य चौकी भवन निर्माण कार्य सुरु भएको छ। कुल करिब ४ करोड ७ लाख रुपैयाँ लागत अनुमान गरिएको यस परियोजनाका लागि काठमाडौँस्थित भारतीय दूतावास र बडिगाड गाउँपालिकाबीच द्विपक्षीय सम्झौता सम्पन्न भएको हो।
सम्झौताअनुसार भारतीय दूतावासले करिब २ करोड ९४ लाख रुपैयाँ अनुदान सहयोग उपलब्ध गराउनेछ भने बाँकी रकममध्ये ५ प्रतिशत लागत गाउँपालिकाले व्यहोर्नेछ। ‘उच्च प्रभाव सामुदायिक विकास परियोजना’ अन्तर्गत निर्माण हुन लागेको भवनको शिलान्यास गाउँपालिका अध्यक्ष गण्डकी थापा अधिकारी र भारतीय दूतावासका द्वितीय सचिव अजयकुमार सिंहले संयुक्त रूपमा गर्नुभएको हो।
शिलान्यास समारोहमा अध्यक्ष अधिकारीले पुरानो स्वास्थ्य चौकी भवन जीर्ण बन्दै जाँदा सेवा प्रवाहमा कठिनाइ उत्पन्न भएको उल्लेख गर्दै स्थानीय आवश्यकताअनुसार नयाँ भवन निर्माण थालिएको बताउनुभयो। उहाँले नेपाल–भारत सहकार्यले स्थानीय पूर्वाधार विकासमा महत्वपूर्ण योगदान पुर्याउने विश्वास व्यक्त गर्नुभयो।
भवन निर्माणका लागि ‘सोले तिलक निर्माण सेवा प्रालि’ सँग ठेक्का सम्झौता भइसकेको छ। गत फागुनमा भएको सम्झौताअनुसार निर्माण कम्पनीले १५ महिनाभित्र काम सम्पन्न गर्नुपर्ने गाउँपालिका उपाध्यक्ष भीमसेन वनले जानकारी दिनुभयो।
यसअघि गत कात्तिक २४ गते भारतीय दूतावास र गाउँपालिकाबीच प्रारम्भिक सम्झौता भएको थियो। स्वास्थ्य पूर्वाधार सुदृढीकरणमा छिमेकी राष्ट्रको सहयोगले स्थानीय नागरिकले गुणस्तरीय सेवा पाउने अपेक्षा गरिएको छ।
