काठमाडौँ – सरकारले आजदेखि देशभरिका बालबालिकालाई भिटामिन ‘ए’ क्याप्सुल तथा जुकाविरुद्धको औषधि वितरण सुरु गरेको छ। राष्ट्रिय भिटामिन ‘ए’ कार्यक्रमअन्तर्गत स्वास्थ्य तथा जनसङ्ख्या मन्त्रालयले दुई दिनसम्म यो अभियान सञ्चालन गरिरहेको हो। स्वास्थ्य सेवा विभागका अनुसार छ महिनादेखि ५९ महिनासम्मका करिब २२ लाख बालबालिकालाई भिटामिन ‘ए’ खुवाइँदैछ। साथै, एक वर्षदेखि पाँच वर्षमुनिका करिब २० लाख बालबालिकालाई जुकाविरुद्धको औषधि ‘अलबेन्डाजोल’ पनि प्रदान गरिँदैछ। अभियानलाई प्रभावकारी बनाउन देशभरका स्थानीय तहले पायक पर्ने स्थानमा खोप केन्द्र स्थापना गरेका छन्। कार्यक्रममा करिब ५२ हजार महिला स्वास्थ्य स्वयंसेविका र १५ हजार स्वास्थ्यकर्मी परिचालन गरिएको विभागले जनाएको छ। भिटामिन ‘ए’ को कमीबाट हुने स्वास्थ्य समस्या न्यूनीकरण गर्ने उद्देश्यले यो कार्यक्रम विसं २०५० मा आठ जिल्लाबाट सुरु भई २०५९ सालदेखि देशभर विस्तार गरिएको हो। त्यसैगरी, जुकाको संक्रमण नियन्त्रणका लागि विसं २०५६ मा १३ जिल्लाबाट सुरु गरिएको औषधि वितरण कार्यक्रम २०६७ सालदेखि सबै जिल्लामा लागू गरिएको छ। सरकारले यस अभियानमार्फत बालबालिकाको पोषण तथा स्वास्थ्य अवस्था सुधारमा महत्वपूर्ण टेवा पुग्ने विश्वास व्यक्त गरेको छ।
