पर्सा — वीरगञ्ज मा मुख्य सडक विस्तारलाई तीव्रता दिँदै अतिक्रमित संरचना हटाउने अभियान आइतबार बिहानैदेखि सुरु गरिएको छ। सडक डिभिजन कार्यालय हेटौँडा ले त्रिभुवन राजपथ अन्तर्गत गण्डकचोकदेखि मितेरीपुलसम्मको सडक खण्डमा निर्माण गरिएका घरटहरा भत्काउन थालेको हो।
कार्यालयका अनुसार सडकको बीच भागबाट दायाँ–बायाँ २५–२५ मिटर क्षेत्र खाली गराउँदै सडक विस्तार गर्ने लक्ष्य राखिएको छ। यस क्रममा करिब एक दर्जन एक्जाभेटर प्रयोग गरी झण्डै १,२०० भन्दा बढी संरचना हटाइने जनाइएको छ।
इन्जिनियर भोला साहका अनुसार सर्वोच्च अदालत को फैसला र संघीय सरकारको निर्देशनअनुसार मापदण्ड विपरीत बनेका संरचना हटाउने कार्य अघि बढाइएको हो। “पटक–पटक सूचना जारी गर्दा पनि अटेर भएपछि बाध्य भएर भत्काउन सुरु गरिएको हो,” उनले बताए।
यता स्थानीय व्यापारी तथा घरधनीहरूले भने छोटो समयको सूचना दिएर घर खाली गर्न बाध्य बनाइएको भन्दै असन्तुष्टि जनाएका छन्। घण्टाघर क्षेत्रमा व्यवसाय गर्दै आएका कन्हैयालाल केशरीले पर्याप्त समय नदिइएको गुनासो गर्दै कम्तीमा एक साताको समय दिएको भए सहज हुने बताएका छन्।
जिल्ला प्रशासन कार्यालय पर्सा ले शनिबार साँझ सूचना जारी गर्दै आइतबार बिहान ४:३० बजेसम्म अतिक्रमित संरचना हटाउन निर्देशन दिएको थियो।
अभियानका क्रममा नेपाल प्रहरी, सशस्त्र प्रहरी बल नेपाल तथा नगर प्रहरीको कडा सुरक्षा व्यवस्थापन गरिएको छ।
संरचना हटाउने कार्यका कारण बिहानदेखि दिउँसोसम्म उक्त क्षेत्रमा विद्युत् तथा इन्टरनेट सेवा समेत प्रभावित भएको जनाइएको छ।
