जनकपुरधाम — मधेस प्रदेश सरकारकी शिक्षा तथा संस्कृतिमन्त्री रानी शर्मा तिवारीले वर्तमान समयअनुसार शिक्षालाई व्यावहारिक, प्रविधिमैत्री र समयानुकूल बनाउनुपर्ने आवश्यकता औँल्याउनुभएको छ।
जनकपुरधामस्थित याज्ञवल्क्य संस्कृत माध्यमिक विद्यालय, ज्ञानकूपको ११७औँ वार्षिकोत्सव समारोहलाई सम्बोधन गर्दै उहाँले गुणस्तरीय शिक्षाले मात्र समाजमा सकारात्मक परिवर्तन सम्भव हुने बताउनुभयो। मन्त्री तिवारीले विद्यालय तहबाटै अनुशासन, नैतिकता र सीपमूलक ज्ञानको विकास गर्नुपर्नेमा विशेष जोड दिनुभयो।
उहाँका अनुसार मधेस प्रदेश सरकारले शिक्षाको पहुँच विस्तार, छात्रवृत्ति वितरण तथा शैक्षिक पूर्वाधार विकासलाई प्राथमिकतामा राखेर काम गरिरहेको छ।
कार्यक्रममा शिक्षा विकास तथा समन्वय इकाइका प्रमुख चेतकुमार पोखरेलले शैक्षिक गुणस्तर सुधारका लागि शिक्षक, अभिभावक तथा सम्बन्धित सरोकारवालाबीच प्रभावकारी समन्वय अपरिहार्य रहेको उल्लेख गर्नुभयो। उहाँले सामुदायिक विद्यालयलाई थप प्रतिस्पर्धी र प्रभावकारी बनाउन सबै पक्षको सहकार्य आवश्यक रहेको धारणा व्यक्त गर्नुभयो।
त्यसैगरी, विद्यालयका प्रधानाध्यापक सञ्जयकुमार झाले विद्यालयको विगतदेखि हालसम्मको प्रगति र आगामी योजनाबारे जानकारी गराउँदै शैक्षिक तथा अतिरिक्त क्रियाकलापमा विद्यालयले उल्लेखनीय उपलब्धि हासिल गरेको बताउनुभयो। साथै, शैक्षिक गुणस्तर अभिवृद्धिका लागि स्थानीय तह, अभिभावक र सम्बन्धित निकायसँग सहकार्यको अपेक्षा व्यक्त गर्नुभयो।
कार्यक्रमकै अवसरमा कक्षा १२ विज्ञान समूहमा अध्ययनरत मेधावी तथा समावेशी विद्यार्थीलाई प्रोत्साहन गर्ने उद्देश्यले १० जनालाई जनही १० हजार रुपैयाँ नगदसहित छात्रवृत्ति प्रदान गरिएको थियो।
