काठमाडौँ । राष्ट्रिय स्वतन्त्र पार्टी (रास्वपा) ले विदेशमा रहेका नेपालीलाई केवल रेमिट्यान्सको स्रोतका रूपमा नभई राष्ट्र निर्माणका सहयात्रीका रूपमा जोड्ने उद्देश्यसहित नयाँ कार्यक्रम सार्वजनिक गरेको छ। पार्टीको प्रवास नेपाली सम्पर्क विभागले जारी गरेको विज्ञप्तिअनुसार प्रवासमा रहेका नेपालीहरूको सीप, अनुभव र अन्तर्राष्ट्रिय नेटवर्कलाई नेपालको विकाससँग प्रत्यक्ष जोड्ने रणनीति अघि सारिएको हो।
यसअन्तर्गत विभागले कम्तीमा १० लाख प्रवास सदस्य बनाउने लक्ष्यसहित ‘प्रवास सदस्यता विस्तार अभियान’ सञ्चालन गर्ने जनाएको छ। साथै, विदेशमा रहेका नेपालीहरूको ज्ञान र विशेषज्ञता अभिलेखीकरण गर्न ‘प्रोफाइल बैंक’ स्थापना गर्ने योजना पनि अघि बढाइएको छ। उक्त बैंकमार्फत लगानीका सम्भावना पहिचान, स्टार्टअप प्रवर्द्धन तथा स्वदेश फर्कन इच्छुक लगानीकर्तालाई आवश्यक सहजीकरण गरिनेछ।
प्रोफाइल बैंकपछि ‘आइडिया बैंक’ अवधारणालाई पनि कार्यान्वयनमा ल्याउने तयारी रहेको विभागले जनाएको छ। यसमार्फत प्रवासमा आर्जित सीप र नवीन सोचलाई परियोजनामा रूपान्तरण गर्दै रोजगारी सिर्जना र आर्थिक समृद्धिमा योगदान पुर्याउने लक्ष्य राखिएको छ। यस पहलले प्रवासमा रहेका नेपालीहरूको भूमिका आर्थिक र नीतिगत रूपमा अझ सशक्त बन्ने अपेक्षा गरिएको छ।
